November-smell for sjømateksporten

NPK-NTB/NETT NO: I november vart det eksportert sjømat for 9,4 milliardar kroner. Det er ein nedgang i verdi på 11 prosent samanlikna med november i fjor.
Med det vart det selt sjømat til utlandet for 1,2 milliardar kroner mindre enn i november i fjor.
– Norsk sjømateksport merkar no verkeleg effekten av ein hotell- og restaurantsektor som meir eller mindre er nedstengt i Europa. I tillegg blir gjerne ete tradisjonsprodukt som klippfisk og tørrfisk i større middagsselskap med venner og familie. Når slike samlingspunkt blir avgrensa, går det ut over etterspurnaden, seier direktør for marknadsinnsikt og marknadstilgjenge Tom-Jørgen Gangsø i Noregs sjømatråd, i ei pressemelding.
Hittil i år er det eksportert sjømat for 96,6 milliardar kroner. Det er ein nedgang på 1 milliard kroner, eller éin prosent, målt mot same periode i fjor.

Rekord i fjor

2019 enda med ein eksport på 107 milliardar kroner, som er rekord.

Det ligg det ikkje an til i år.
For første gang sidan 2012 får vi truleg eit år der verdien av sjømateksporten fell, mellom anna på grunn av nedgangen i hotell- og restaurantmarknadne på grunn av koronaepeidemien, skreiv rådgivar Kay Ove Hafsås i bransje- og arbeidsgivarorganisasjonen Fiskebåt i eit innlegg i NETT NO i september i år.

Sterk november i fjor

Gangsø understrekar at november i fjor var svært sterk. Han meiner samtidig at verdifallet hadde vore større om ikkje den norske krona hadde vore så svak.
– Det store julesalet må i år dekkast av detaljhandelen, men det vil ikkje vere nok til å vege opp for bortfallet av etterspurnaden frå restaurantane. Eit resultat av dette er ein betydeleg redusert pris for dei fleste av sjømatprodukta, seier Tom-Jørgen Gangsø.
Polen, Danmark og Frankrike var dei største marknadene for norsk sjømat i november.

– Ligg an til å bryte magisk grense

Fiskeri- og sjømatminister Odd Emil Ingebrigtsen (H) seier at sjømatnæringa til liks med resten av næringslivet er prega av koronasituasjonen.
– Men sett under eitt vil eg seie at næringa har klart seg bra gjennom krisa. Koronasituasjonen har skapt utfordrande marknadsforhold, men aktørane i næringa har gjort ein stor jobb for å tilpasse seg situasjonen, seier Ingebrigtsen til NTB.
Han understrekar at sjølv med ein verdinedgang i november ligg sjømateksporten i koronaåret 2020 på eit høgt nivå samanlikna med tidlegare år.
– Medan eksporten av enkelte produkt er redusert som følgje av koronasituasjonen, er det andre produkt som klarer seg godt gjennom krisa. Totalt sett ligg vi an til å bryte den magiske grensa på 100 milliardar kroner i eksportverdi for norsk sjømat. Dette er svært gledeleg, teke i betraktning av at vi er i ein ekstraordinær situasjon, seier Ingebrigtsen.