Børsdagen: Ny årsbeste for Endúr

Industri- og ingeniørselskapet Endúr var verdsett til 38 kroner aksjen då 2023 ebba ut. I dag steig kursen 1,8 prosent, til 56,50 kroner. Det er rekord for året, opp 48,68 prosent sidan nyttår og ein kurs som verdset selskapet til 2,1 milliardar kroner.

Ei av forklaringane på den stigande aksjekursen kan vere at datterselskapet Artec Aqua omsider kunne glede seg over at det blir byggestart for byggesteg to for Salmon Evolution sitt landbaserte oppdrettsanlegg i Indre Harøy på Romsdalskysten.

Artec Aqua i Ålesund er spesialist på å teikne og prosjektere landbaserte oppdrettsanlegg , og var tidlegare det viktigaste selskapet i Endúr-konsernet. Men ordreinngangen tørka inne etter at regjeringa varsla at den ville legge ein ekstraskatt på oppdrettsnæringa - grunnrenteskatt, og 2023 vart eit magert år for Artec Aqua.

No ser det imidlertid ut til å løsne, og når det er vekst også i andre deler av konsernet har det løfta aksjekursen jamt og trutt i år.