Nytt design-ikon til L K Hjelle

I 2014 sikra møbelprodusenten L K Hjelle i Sykkylven seg retten til å produsere kvilestolen Siesta.

I dag står Siesta for omlag en fjerdepart av inntektene til L K Hjelle og sel godt både i Noreg og utlandet.

I sommar gjorde L K Hjelle ein avtale med Vatne Møbler om å overta produksjonen av Falcon-stolen, og dagleg leiar Jens Peter Brunstad har tru på at Falcon-stolen kan bli like viktig for selskapet som Siesta-stolen har blitt.

Møbelikon
- Vi lanserte før ferien. Responsen er kjempebra. Det er eit møbelikon som supplerer kolleksjonen vår, seier Brunstad om Falcon-stolen.

Falcon-stolen vart teikna av møbeldesignar Sigurd Resell i 1971 for Vatne Møbler og blei ein stor kommersiell suksess.

I løpet av tre år etter lanseringa hadde Vatne Møbler auka salet frå rundt 10 til rundt 35 millionar kroner i året.

Relansert
I 2017 relanserte Per Arne Sæter i Vatne Møbler Falcon-stolen og har seld og produsert den fram til L K Hjelle inngjekk avtale om å overta produksjonsrettane.

Sæter var med og starta Vatne Møbler på nytt i 2003, etter at selskapet forsvann ut av soga etter at Stokke-konsernet kjøpte selskapet i 1989.

Vatne Møbler produserte Falcon-stolar frå 1971 til 1997.