Nytt søskenpar står klare til å overta

Etter mange år med tvillingane og gründerane Åge og Magne Grimstad i førarsetet, har det skjedd endringar hos Fantastiske Osberget i Ulsteinvik 

Designbyrået har fått ny eigarstruktur og det er lagt til rette for at Stine Johnsen og Lena Cavaliere er det nye søskenparet som skal føre verksemda vidare.

– Det er viktig at selskapet skal få leve vidare, og no er vi rigga for framtida, fortel Åge Grimstad til Nett No. 

Er framleis hovudaksjonær
På privaten har tvillingbrørne vore opne om kreftsjukdom og delt sine erfaringar i førestillingar og foredrag for å samle inn pengar til forsking. 

62-årige Åge Grimstad påpeiker at grepa dei no tek på eigarsida er naturleg både med tanke på alder og helse. 

– Slik kan selskapet halde fram med dyktige medarbeidarar som har vore med oss lenge, legg han til. 

Åge er framleis hovudaksjonær med 41 prosent av aksjane, medan broren Magne ikkje lenger er inne på eigarsida. No eig Stine Johnsen og Lena Cavaliere 24 prosent kvar av aksjane, og Anders Edvardsen 11 prosent. 

Starta i 1993
Verksemda starta allereie i 1993, sjølv om selskapet Fantastiske Osberget ikkje blei registrert før i 2012.

På det meste for kring ti år sidan hadde Åge og Magne Grimstad 14 tilsette i arbeid. I dag er dei 9 personar som jobbar i selskapet. 

Det siste året byrået levert større prosjekt innan strategi, merkevarebygging og profilering for reiarlaget Rem Offshore, hatt internasjonalt samarbeid med Xledger og levert fleire nettsider til mellom anna Remøy Management. 

Dei har óg levert merkevarefilm for Libra-Plast på Hareid.

Vil auke inntektene
I 2024 hadde Fantastiske Osberget-selskapa samla ei omsetning på drygt 9 millionar. Åge Grimstad fortel at dei har mål om å auke inntektene betydeleg. 

– Vi håpar å kome opp i 10 til 15 millionar, fortel han. 

Grimstad trur nøkkelen for å lukkast er å styrke samarbeidet mellom avdelingane i Oslo og Ulsteinvik.

For å nå målet skal byrået mellom anna lansere ny strategi og merkevare – med ny visuell profil og nettside tidleg neste år. 

Bransje i vekst
Ålesund-byrået Havnevik er mellom Fantastiske Osberget sine konkurrentar – eller «kollegaer» som Åge Grimstad helst omtalar dei som. 

Peil er eit anna selskap som har vekse i marknaden for design- og kommunikasjonsbyrå på Nordvestlandet dei siste åra. Samla sett har bransjen også vekse i regionen.

Lokalt i Ulsteinvik har dei konkurranse frå selskapet Tegneren, som har vore i bransjen sidan 2005. 

– Dei har vore med på å gjere design til eit konkurransefortrinn i det lokale næringslivet, og har skapt mange gode logoar og profilar på Sunnmøre. Dette vil vi halde fram med, seier Åge Grimstad.