– Vi måtte rett og slett selje – og det funka

To søsken og ei mor utgjer personane bak det nystarta selskapet Joda Media med adresse i Fosnavåg. 

Dei starta opp våren 2024 og omtalar seg sjølve som strategiske historieforteljarar. Målet er å hjelpe bedrifter til å bygge merkevarene sine ved hjelp av strategi, film, tekst og foto i ulike formar. 

– Dei fleste som kjem til oss, seier ikkje: «Vi vil ha marknadsføring». Dei seier: «Kan de ikkje fortelje historia om oss?», seier Josefine Spiro til Nett No. 

36-åringen er dagleg leiar for bedrifta ho har starta opp samen med broren, Daniel Spiro (33) og mora, Hilde Mysen Løkken. 

Broren er fotograf, regissør og produsent, medan mora har meir enn 20 års erfaring som journalist og vore mange år i reklamebransjen. 

– Og så er det eg som har jobba til saman 18 år som journalist, i tillegg til to år som digital innhaldsprodsent for Havila Kystruten. Etter at vi starta Joda Media, har eg også teke fleire kurs i digital marknadsføring, fortel ho vidare.

Stod brått utan inntekter
Tidlegare i år fekk historieforteljingsbyrået ei tøff lærepenge. Plutseleg stod dei utan inntekter ei periode etter at tre store oppdrag forsvann.

– Det første eg gjorde var å starte ein kampanje og køyre rabatt i ein avgrensa periode. Vi såg kor mykje kapasitet vi hadde, også kom det inn éin kunde der, seier ho.

Samtidig tok ho kontakt med tidlegare kundar.

– Eg ringde eksisterande kundar og foreslo: «Skal vi ta og gjere dette no?». Eg meinte det ville vere godt for dei. Vi måtte rett og slett selje – og det funka, seier ho.

Tenker meir langsiktig enn før
Tapet av oppdraga baud på ein brå oppvakning for gründerbedrifta. 

36-åringen meiner lærepengen bestod i at det ikkje held med å vere flinke.

– Vi innsåg at vi også måtte sikre oss inntekter ved hjelp av meir langsiktige avtaler, seier ho. 

Trass i presset med å skaffe nok inntekt til å overleve, vel dei å halde fast ved prinsippa sine og takkar nei til enkelte oppdrag.

– Vi kan godt takke nei til prosjekt, sjølv om vi treng pengane. Viss vi til dømes tenker at det ikkje er etisk rett, eller at vi ikkje ser korleis vi skal bidra, fortel Spiro. 

Færre nyetableringar i Møre og Romsdal
Ein titt i statistikken frå Brønnøysundregistera viser at det er blitt starta markert færre nye selskap i Møre og Romsdal i år. 

Første halvår i 2025 blei det registrert 781 nyetableringar i fylket. I fjor var talet 894 i same periode. 

• Klikk for å sjå selskapa som har starta første halvår i Møre og Romsdal 

Eit fall på 113 nyregistreringar utgjer ein nedgang på kring 12 prosent. 

I heile 2024 var det registrert 1676 nye selskap i Møre og Romsdal, medan talet var 1658 i 2023. 

Historisk viser det seg vanskeleg å berge nystarta selskap gjennom dei første oppstartsåra. Nær halvparten av alle nyregistrerte føretak legg ned drifta allereie i løpet av det første driftsåret. 

– Levde på sparepengane
Slik sett har det ferske Herøy-selskapet allereie bevist at dei har livets rett. 

Joda Media-gründeren legg ikkje skjul på at det er tøft å skape sitt eige levebrød – men har valt å vere open om utfordringane i starten. 

– Eg levde på sparepengane, og tok ikkje ut løn dei første tre månadene, fortel ho. 

I dag er ho den einaste som jobbar fulltid i selskapet. Målet på sikt er å bli fleire. 

– Målet i første omgang er å omsette for 100.000 kroner i månaden.  Eg veit ikkje kor lang tid det vil ta, men eg håpar det går, seier ho. 

Historia om Fosnavåg konserthus slo an
Reiarlaget Rem Offshore og Runde Miljøsenter har vore byrået sine største kundar så langt. Framover blir det også meir oppdrag for sistnemnte. 

– Vi jobbar med eit dokumentarprosjekt som er støtta av forskingsrådet, og som er drive av verdiar og engasjement som vi kjenner oss veldig igjen i, seier Spiro. 

Ho meiner selskapet skil seg frå tradisjonelle reklame- og kommunikasjonsbyrå ved at dei brukar journalistiske metodar og har eit annleis blikk. Samtidig opplever ho at kundane deira forstår verdien av historieforteljing. 

– Vi er ikkje redde for å skrive lange saker om historiane er sterke nok. Den lengste saka vi har laga, er også den som gjekk best. Det var historia bak Fosnavåg konserthus. Den hadde over 3000 visningar på tre dagar, fortel ho.