Offshore servicefirma i vekst

- Vi treng to til tre fleire tilsette, men det er ikkje så lett å få tak i folk med god erfaring og nødvendig kompetanse, seier dagleg leiar Stein-Ove Hustad i West Inspection.
Selskapet er ei sakkunnig verksemd godkjent av Sjøfartsdirektoratet til å utføre inspeksjonar og sertifiseringar på MOU-installasjonar og offshorefartøy.

Heile verda

Hustad kan lokke med ein spennande og fleksibel jobb.
- Vi opererer over heile verda. Ein dag er vi i Singapore, neste dag i Asia, Brasil, USA eller Bergen.
- Eigentleg passar dette best for godt vaksne folk som har vore ut eit par vinternetter før.
Hustad starta selskapet i 2013 saman med kollega Olav Fagerbakke. Medan Hustad har base i Sykkylven, held Fagerbakke til i Åseral nord for Kristiansand. På begge dei to plassane er det tre tilsette, i tillegg til to tilsette ved avdelinga på Vestbase i Florø.
- Vi er no åtte tilsette, og planlegg å verte rundt ti i løpet av året, seier Hustad.

ISO 9001

Han har sjølv brei erfaring fra offshorebransjen, blant anna som Chief hos Bergesen d.y. og Bourbon Offshore før han starta i National Oilwell Varco. For sistnemnde var han blant anna tre år site manager ved Yantai-verftet i Kina for bygging av semi-sub boreriggar.
West Inspection driv med årleg og femårleg kontroll og sertifisering av offshor kraner, dekkskraner LARS-system, boreutstyr, LSA og anna offshoreutstyr.
- Vi har dei sertifiseringene og godkjenningene som trengst.
- Vi har også nyleg vorte ISO 9001-sertifisert, seier Hustad.

Større aktivitet

Selskapet omsette i 2018 for 13,8 millionar kroner, opp frå 10,0 millionar året før.
- Vi merkar at det har vorte meir aktivitet i offshore, seier Hustad.
- Målet er at vi skal klare 20 millionar i år.
Hustad og kollegaene har lukkast å få dei fleste store offshoreselskap som kundar, men har også selskap innen oppdrettsnæringa og skipsverft på kundelista.
- Fokuset er å holde kostnadene mot kundar så lave som mulig.
- Vi har fått tre nye kundar hittil i år.

- Vår nye utanriksflåte

På slutten av fjoråret avslutta selskapet blant anna 10-årsklassing av alt offshoreutstyr på offshore konstruksjonsskipet Far Samson.
- Dette oppdraget vart utført på Kypros.
- Neste oppdrag vi har er i Peterhead i Skotland, og gjeld årsklassing av eit konstruksjonsfartøy.
Hustad seier at ein følgjer skipa ut der dei er.
- Offshoreflåten er eigentleg vår nye utanriksflåte. Difor må vi vere der skipa er til eikvar tid.

- Må ha erfaring

Eit oppdrag kan fort vise seg å vere i Nigeria.
- Du sender ikkje kven som helst på oppdrag åleine til Nigeria.
- Dette må vere folk med erfaring og folk som kan ta avgjersler der og då sjølve.
Hustad seier at selskapet har vorte svært godt mottatt.
- Ja, eg angrar slett ikkje på at eg satsa på å etablere eit eige selskap. Det ser bra ut framover.
Han og Olav Fagerbakke eig kvar 50 prosent av selskapet, eit selskap som i praksis er gjeldfritt.