Oljepessimisten Thina Saltvedt

- Det flommar over av olje. Alt tyder på at energiprisane vert lave i lang tid framover, fastslo Nordea sin sjefsanalytikar under eit møte i Fosnavaag Shippingklubb måndag.
I salen var det fleire hardt pressa offshorereiarar, som same dagen hadde sett at oljeprisen var heilt nede på 27 dollar fatet, det lavaste nivået sidan 2003.

Overraska

Saltvedt vedgjekk at ho sjølv var overraska over kor langt ned prisen hadde gått, og hadde fleire gongar vorte nøydd til å nedjustere sine prognosar.
Ho trudde likevel at dei som hadde håp om ein snarleg og kraftig oljeprisoppgang, ville verte skuffa.
- Vi trur ikkje prisen skal mykje ned, men vi trur heller ikkje på ein kraftig auke.

- OPEC har lukkast

Ho meinte at OPEC hadde lukkast med sin strategi ved å pøse ut enorme mengder rimeleg olje frå Midt-Austen.
- Dette har ført til at ei rekkje prosjekt ikkje lenger er lønsame, og oljeinvesteringane stuper.
- Men ikkje i Midt-Austen. Der aukar investeringane.

Iran-olje på veg ut

Saltvedt sa at strategien var å presse dyr olje ut, og å ta tilbake mykje av oljehegemoniet når det på nytt vart balanse mellom tilbod og etterspørsel.
- Slik sett er dette ein strategi som ser ut til å virke, sjølv om Saudi Arabia og fleire andre land no slit økonomisk på grunn av den lave oljeprisen.
Oppheving av Iran-sanksjonane gir rundt 700.000 ekstra fat olje per dag, og bidreg til endå meir prispress.
- Rykta seier at første båten med olje no er på veg frå Iran no.

Trur på skiferoljekutt

Også for eitt år sidan besøkte Saltvedt shippingklubben. Då meinte ho at ein raskt ville få ein reduksjon i skiferoljeproduksjonen i USA. Det har ikkje skjedd.
- Aktørane har vore flinke til raskt å redusere kostnadene, fastslo ho og viste også til at mange aktørar hadde sikra seg oljeleveransar til høge prisar, der fleire av dei lukrative kontraktane snart går ut.
Difor trur ho nok ein gang på ein nedgang i skiferoljeproduksjonen.
- Mange av aktørane vil snart få problem med dagens lave oljeprisar. Vi forventar at det vil gi seg utslag i andre og tredje kvartal.

Raske teknologiskifter

Thina Saltvedt hadde sjølv vore i Paris då klimaavtalen vart forhandla fram. Ho meinte at overgangen til meir miljøvenlege energiformer ville gå raskt.
- Vi skal ikkje undervurdere tempoet i dei teknologiske skifta som no foregår, spesielt innanfor transportsektoren.
- Transport står for 54 prosent av oljeforbruket no og er den siste store oljeskansen. Her skjer endringane fort.
Olympic Shipping-direktør Stig Remøy lurte på om ikkje oljen var ein del av løysinga, og viste til den store forureiningskjelda som kol utgjer.
- Gass kan vere ein del av løysinga, truleg ikkje olje, sa Saltvedt.