Tysdag var det klart for opning av eit nytt nasjonalt testsenter for møbel- og designbransjen.
Nyvinninga har fått namnet Plusslab Testsenter og held til ved Næringsfabrikken i Sykkylven.
Ein rekke inviterte gjestar og partnarar var med då snora blei klippa av ordførar Olav Harald Ulstein i Sykkylven.

– Dette er ein gledesdag. Og dette er ein del av grunnmuren som møbel- og designindustrien treng, sa bransjesjef Egil Sundet for designindustrien i Norsk Industri.
Han tok innleiingsvis for seg bakgrunnen for nyetableringa.
Etter at møbel- og designbransjen stod utan eit tilbod der dei kunne få utført akkreditert testing i Norge, fekk Sundet ein telefon frå Ekornes med beskjed om at «dette går ikkje. Vi må gjere noko».
Difor blei det samde om at møbelprodusenten skulle kjøpe utstyret frå det tidlegare senteret med tanke på ein ny etablering av eit testsenter.

Har allereie førespurnader
Dei konkrete planane om å etablere eit nytt senter i Sykkylven, blei lagt i fjor.
Gry H. Stavseng i Gagn har vore prosjektleiar for arbeidet som munna ut i tysdagens opning.
– Allereie før vi har opna, har dei første førespurnadene kome, fortalde ho.

Sju aktørar har gått inn med kapital
Ein rekke aktørar har vore med i prosjektarbeidet. I tillegg har sju aktørar gått inn med aksjekapital på 940.000 kroner i eit selskap under etablering Plusslab AS.
Dei som har stilt med aksjekapital er: Ekornes, Flokk, LK Hjelle Møbelfabrikk, Slettvoll Møbler, Sykkylven Stål, Designindustrien – Norsk Industrien og Sykkylven kommune.
– Vi er veldig takksame for det, sa Stavseng som sjølv blir konstituert dagleg leiar i starten.
Senteret startar med to tilsette og målet er å starte dei første testane i februar. Styreleiar blir Jon Daniel Nesje.

– Treng også fleire partnarar
For drifta av testsenteret er det inngått partnaravtaler med kring 15 bedrifter. Mange av dei er store møbel- og madrassprodusentar, men det er også aktørar innan arbeidskle og tekstilar.
Avtalane sikrar selskapet eit økonomisk grunnlag. Etter kvart som senteret blir akkreditert, vil det også kome inntekter frå testing.
– Vi treng også fleire partnarar, sa Stavseng.
Målet er at senteret skal bli godkjent som akkreditert testsenter i andre halvår. I første omgang startar dei med å tilby testar for møbelindustri, deretter tekstilbransjen. Vidare vil dei vurdere testing for fleire bransjar.
Tidlegare senter lagt ned i 2023
Nedlagde Riss Testlab i Sykkylven har tidlegare gjort slike akkrediterte testar for møbel- og designbransjen.
Grunna låg bemanning missa testlab-en retten til å drive akkrediterte testar i 2020. Mot slutten av 2023 blei senteret lagt ned, til fortviling for bransjesjef Egil Sundet i Norsk Industri.
Resultatet var at produsentar måtte sende produkta sine utomlands for å gjere testar etter europeiske kvalitetsstandardar.
Publisert: 28.01.2025 15:18
Sist oppdatert: 28.01.2025 18:21