Nytt liv i den gamle Hjellegjerdefabrikken

Nokre få hundre meter før ein kjem inn til sentrum i Sykkylven frå nord, ligg den tidlegare Hjellegjerdefabrikken.

Etter fleire år med liten aktivitet i bygget, er det i ferd med å vekse fram ein mangfaldig arbeidsmiljø og møteplass i det som no heiter Næringsfabrikken.

Målet til eigedomssjef Kurt Sørgård er å fylle heile det nær 27.000 kvadratmeter store bygget med liv og røre. Det er enorme areal som svarar til kring fire og ei halv fotballbane. Og dei er godt på veg allereie.

– Vi har teke i bruk kring 17.000 kvadratmeter, men vi måler suksessen i talet på arbeidsplassar som er i bygget, seier Sørgård.

Historisk og moderne interiør
I dag er det 42 bedrifter med 85 personar på plass, og dei blir snart fleire. Meir om det litt seinare.

Det første som møter besøkande på Næringsfabrikken er ein lobby med nye fargar og ledlys, møblert med prisvinnande møblar frå regionen. Vegg i vegg med lobbyen er kontoret til Sørgård, med svartkvitt fotografi av Hjellegjerde-grunnleggjaren på veggane.

– Vi ønsker å ha med oss historia inn i bygget, seier Sørgård medan han viser oss rundt.

– Bygger stein på stein
Snøballen tok til å rulle for kring to år sidan. Då gjekk fleire lokale bedrifter saman om å kjøpe bygget. Sakte, men sikkert er det blitt ny aktivitet i dei enorme bygningsmassane.

– Vi har masse igjen å gjere, men vi bygger stein på stein og forsøker å gjere ting på ein mest mogleg berekraftig måte, fortel Sørgård.

I andre etasje blir ein møtt av eit kontorlandskap med glasveggar, fleire møterom og kantine med «hagelandskap» under ein stor glaskuppel.

Mot sjøen er det eit stort ope landskap med plass til fleksible arbeidsstasjonar og ei mobil scene. Snart kjem det flyttbare veggar på hjul.

– Har tenkt fleksibilitet heile vegen
Frå panoramavindauga har ein utsikt til både fjord, fjell og industrihistoria med bedrifter som ligg langs sjøkanten.

– Vi har tenkt fleksibilitet heile vegen og det er mogleg å gjere endringar enkelt og raskt, seier Sørgård.

Dei 35 kontorplassane er fordelt på større studio og cellekontor. Møteromma kan delast opp i to nye cellekontor i løpet av ein dag.

Innafor ei dør er det ein konferansesal med plass til 130 personar.

– Salen kan også bli strippa heilt, slik at den til eksempel kan bli nytta som fotostudio, seier Sørgård.

Kontorlandskap med pub og scene
Eigedomssjefen har fått med seg Karoline B. Ekornes Myklebust som vertskapskoordinator på huset. Ho har mellom anna ansvar for å legge til rette for dei som har kontorplass på huset. I dag er dei fleste 35 kontorplassane opptekne.

– No har vi to ledige kontorplassar. Vi har også interesse frå folk som vil sitte i ope landskap. Det vil vi marknadsføre framover, fortel Myklebust.

Langs den eine veggen er det etablert «Næringspub», som blir drive på dugnad av ein gjeng med frivillige knytt til bygget – mellom anna Sørgård og Myklebust sjølv.

– Mange tilbakeflyttarar er vande med å jobbe i opne sosiale landskap, og vi opplever at dei ønsker å ha desse kvalitetane her også, seier Sørgård.

Det er framleis god plass til å utvide med fleire kontorplassar. Samtidig jobbar dei parallelt med å utvikle resten av bygget.

Amatec skal flytte inn
I første etasje er det snart klar for at Amatec skal flytte inn i eit lokale på kring 3000 kvadratmeter. Leverandørbedrifta til møbelindustrien med drygt 30 tilsette er også mellom dei som har gått inn som eigarar i bygget.

I det store bygget er det også fjernlager for både Ekornes og Sandella. Og undervegs i omvisinga går vi forbi resten av varelageret til munnbindfabrikken Innovern, som hadde produksjon her inntil i fjor.

I underetasjen held Sykkylven Crossfit til, og eit av dei neste prosjekta er å lage eit arbeidsfellesskap for kreative yrke og kunstnarar. Eit felles trimrom med badstove og dusj vil også snart kome på plass.

– Vi forhastar oss ikkje og undersøker kva for interesse som er for ulike tilbod, før vi set i gong, seier eigedomssjefen.

– Ein plass av bedrifter, for bedrifter
I «hageområde» står Variér-stolen Ekstrem stilt ut. Det viser seg å vere pilotutgåva av den berømte stolen som først blei produsert av Hjellegjerde. Plansjar av stolen frå marknadsføringa fann dei bak eit skap.

– Vi eksperimenterer ein del med alt frå gamle gardiner og møblar som vi finn rundt på bygget, fortel eigedomssjefen.

Nyleg er det også bygd eit eige studio til produksjon av podcast. Nokre meter lengre inn i bygget er dei i gong med å bygge lokale til ein tech-lab med store vindauge etter inspirasjon frå Rebel i Oslo.

– Dette skal vere ein plass av bedrifter, for bedrifter. Her kjem ein rett inn i eit miljø der ein ikkje treng å tenke på møterom eller kantine, seier Sørgård.

Næringsfabrikken har samtidig større ambisjonar enn å vere ein møteplass for kommunen med 7500 innbyggjarar.

– Vi tenker å lage det så bra her, at ein del av dei som no har aktivitetar andre plassar i regionen, i staden ønsker å kome hit, seier Sørgård.