Opptur for camping-nykomar

Så langt i år ligg Fram R. Horgen i Tellus Ålesund 23 prosent over salet på tilsvarande tid i fjor, og med betre lønsemd.

No er utfordringa å få tak i nok bilar og vogner. Den verdsomspennande koronaepidemien har skapt forseinkingar hos produsentane og i distribusjonen og Horgen har gått utradisjonelt til verks for å få fylle opp varelageret når leverandørane ikkje kan levere nok i tide.

- I 2021 har vi kjøpt bilar rundt om, seier han.

Credo i ryggen
Tellus Ålesund opna dørene i Breivika i Ålesund våren 2018. Då heitte selskapet Juro Caravan Ålesund. Horgen var medeigar, saman med Juro Caravan i Malmefjorden. Selskapet starta på null og passerte 105 millionar kroner i driftsinntekter i fjor (sjå tabell).

I vår kom investeringsselskapet Credo Partners inn på eigarsida for å skape Tellus Caravan & Fritid, eit konsern som samla i alt 12 selskap i bubil- og campingvognbransjen. I 2020 hadde konsernet 1,5 milliardar kroner i driftsinntekter (proformatal) og eit resultat før av- og nedskrivingar (ebitda) på 45 millionar kroner.

Credo Parteners eig 51 prosent i Tellus-konsernet. Resten er eig av eigarane og nøkkelpersonell i selskapa som gjekk inn i konsernet.

Credo Partners har mellom anna vore medeigar i Optimar og er medeigar i MMC First Process.

Større aktører
Tidlegare Juro Caravan Ålesund er ikke åleine om å bli ein del av ein større aktør.

I 2017/2018 blei Skorpen og Myren Bil ein del av Ferda-konsernet, og i 2018 blei Caravanservice innlemma i det som blei Ferda Ålesund - som flytta inn i nye lokale på Håhjem i 2019. (Ferda Ålesund er ei avdeling i Ferdakonsernet, reknskapstala er ikkje offentlege gjennom Brønnøysundregisteret.)

I 2014 starta Magnar Romestrand Sunnmøre Caravan (sjå tabell) og etablerte etterkvart drift også i Stryn gjennom datterselskapet Nordfjord Caravan, og har i år også opna avdeling i Furene i Volda.