Opptur for Formfin

Formfin Møbler auka inntektene og arbeidsstokken og snudde minus til pluss i 2020.

Kostnadskutt og meir effektiv produksjon, auka innsats inn mot kundane og ein koronaepidemi som auka møbelsalet. Den kombinasjonen var med og løfta både sal og lønsemd hos møbelprodusenten Formfin i Hundeidvika.

I fjor vår/tidleg sommar fekk selskapet også god hjelp av auke etterspørsel etter utemøblane sine, som utgjer omlag 10 prosent av inntektene til selskapet.

God start på 2021
I april stupte salet, men i dei 11 andre månadane i fjor selde Formfin betre enn i 2019, og den gode utviklinga held fram i år.

- Januar og februar har fortsett som hausten i fjor slapp, seier dagleg leiar og medeigar Steinar Magne Myrseth i Formfin Møbler.

Det betyr at selskapet ligg over budsjett, så langt i år.

Selskapet sysselset 40 årsverk og auka arbeidsstokken med fire-fem personar i fjor, og kjem til å auke også i år.

Nye medeigarar
I fjor gjekk selskapa Råna Invest og Poma Invest inn med to millionar kroner i nye eigenkapital i Formfin Møbler, og eig no omlag ein tredjepart kvar i møbelprodusenten, saman med Stol og Møbelfabrikken Formfin as.

Kombinasjonen av fleire tøffe år og eit ønskje om eit generasjonskifte var årsaka til kapitalutvidinga.

– Bakgrunnen er at vi tre som er aksjonærar, er frå 66 til 70 år og ikkje har naturlege arvtakarar i familien. 2019 gjekk i minus med kring fire millionar og vi kunne ikkje helde fram på same viset, sar Myrseth til NETT NO i fjor.