Planar om store løft på Flatholmen

I dag er eit område på 300.000 kvadratmeter tatt i bruk  på Flatholmen nord for Aksla i Ålesund.

Og det er etterspørsel etter meir, fortel hamnefogd Ole Christian Fiskaa i Ålesundregionens Havnevesen til Nett No. 

På eit beredskapsseminar under Sjømatfestivalen i Ålesund denne veka presenterte han korleis havnevesenet planlegg at området ved Ellingsøyfjorden kan bli etter ytterlegare utbygging.

Vil utvide med 150.000 kvadratmeter 
Planen er å både utvide mot nord - ut i sjøen og langs land mot aust. Samla vil det gi ytterlegare 150.000 kvadratmeter areal. 

Reguleringa for første del av utbygginga mot nord er allereie på plass, og planen er å starte utfylling i sommar for å bygge meir land. 

Mot aust og ytterlegare utbygging mot nord krev reguleringsarbeid og der har havnevesenet langsiktig perspektiv, seier Fiskaa til NettNo. 

Langsiktig mål
Etter første del av vidare utbygging mot nord er ferdig er det utbygginga mot aust hamnefogden reknar med blir først ferdig. 

Dette svarar han om kva han håpar er status om 10 år.

– Då vil eg håpe vi er komne veldig langt på Flatholmen aust.

Fjellhallar og tunnel
Hamnevesenet planlegg ikkje berre utbygging utandørs. 

På ønskjelista står også hallar inne i fjellet. Det vil gi ytterlegare areal, som til dømes kan brukast som lager - og gi steinmassar til vidare utfylling i sjøen.

Punkt tre på ønskjelista er ein omlag tre kilometer lang tunnel gjennom Aksla til Nørvasundet. 

Beredskap
Tunnelen handlar også om beredskap, om til dømes Flatholmen skulle bli mottakshamn for allierte militære styrkar og utstyr. 

I dag går all trafikken gjennom ein tunnel, som er bygd i tilnytning til dei undersjøiske tunnelane til Ellingsøya og Giske . 

I tilleg er der smal veg til Ålesund sentrum langs fjorden. Ein ekstra tunnel vil redusere sjansane for å blokkere Flatholmen ved ein krisesituasjon.  

Flytta containerhamna
Det store spranget for utbygginga av Flatholmen kom med vedtaket om å flytte containerterminalen på Aspøya, til nordsida av Aksla. 

Men allereie no er storpartene av areala utseld eller utleigd.

Logistikk- og spedisjonsselskapet Tyrholm & Farstad dreiv containerterminalen i Skutvika i Ålesund fram til dei nye lokala og areala på Flatholmen blei tatt i bruk i juli 2024. 

Der har selskapet eit terminalområde på 82.000 kvadratmeter. Det er meir enn dobbelt så stort som i Skutvika. 

Flyttinga la også grunnlaget for ein kraftig inntektsvekst. Per første halvår i fjor lå selskapet an til å doble inntekta i 2025,  samanlikna med 2024.

Modellen til Ålesundregionens Havnevesen er å bygge og leige ut bygg på Fflatholmen i eigen regi, eller la firma bygge på festa tomt.

Cruisetrafikken betalar
Inntektene frå cruiseanløp utgjer over 66 prosent av dei årlege inntektene til Ålesundregionens Havnevesen. I 2025 var inntektene til Ålesundregionens Havnevesen 142 millionar kroner.

Cruisetrafikken spelar dermed ei viktig rolle i finansieringa av vidare utbygging til havnvesenet, i tillegg til dei komande inntektene frå salet av arealet som tidlegare vart brukt til containerhamn i Skutvika.