Polyform-eigarane investerer gjerne meir i nordvest

Førre veke fortalde NETT NO om opninga av den nye produksjonshallen som aukar kapasiteten hos Polyform i Ålesund.

Investeringa på kring 60 millionar er realisert med god draghjelp frå dei svenske eigarane i Ernströmgruppen, og styreleiar Michael Olsson deltok då Ålesund-bedrifta feira utvidinga.

– Ingen kommentar, seier styreleiaren med eit lurt smil på spørsmål om dei har konkrete oppkjøpsplanar på Nordvestlandet.

Men han stadfestar at det er ein region dei er godt merksame på.

– Vi gjer gjerne meir investeringar i nærområdet her, legg han til.

– Selskap som kan ha nytte av kvarandre
Konsernet har vore aktive på oppkjøpsfronten, og berre i fjor fekk dei sju nye selskap inn i porteføljen.

– Vi er alltid interesserte i selskap med bra folk og kultur, og som er gode entreprenørar. Men det finst fleire dimensjonar enn pengane. Vi skal både tene pengar i dag – og legge til rette for neste generasjon, seier Olsson.

– Vi ser gjerne etter selskap som er i nærliggande bransjar, eller har nærliggande kompetanse. Først og fremst handlar det om selskap som kan ha nytte av kvarandre, utdjupar han.

Konsern med over 40 selskap
Ernströmgruppen har vore Polyform sine eigarar sidan 2017, og er eit familieeigd konsern med røter tilbake til 1918. Dei fleire enn 40 selskapa i konsernet omsette i fjor for 4,6 milliardar svenske kroner.

Olsson fortel at dei jobbar etter ein desentralisert modell der selskapa skal halde fram som sjølvstendige aktørar.

– Ein slikt miljø der alle får vere med å ta ansvar, er veldig kraftfull og skapar mykje engasjement hos bedriftene. Slik vi ser her hos Polyform, seier han.

Største investering til no
Investeringa i den nye produksjonshallen hos Polyform, er den største eigarane har gjort til no.

Polyform-sjef Vidar Aasestrand er ikkje i tvil om at dei svenske eigarane har vore rett val for dei – og la vekt på at dei tenkte langsiktig.

– Vi gjorde eit fantastisk val, sa han under opninga – og kom samtidig med eit ønske om nye investeringar framover.

Bedrifta lagar blåsar og fenderar i plast, og Aasestrand vil gjerne investere i ei mølle som ta i mot råstoff for å lage resirkulerte produkt.

Aktuelt å satse meir på Polyform
Styreleiar Olsson seier det er aktuelt å satse meir på Blindheim-bedrifta. Han viser til at ein av fordelane med å vere del av eit større konsern, er at selskapa har fleire å samarbeide med i slike prosessar.

– Vidar her på Polyform kjem gjerne med ein plan, så kan vi sette opp grupperingar som kan jobbe saman, og finne ut av korleis ting kan gjerast, seier han.

Arbeidet med å få tilgang til kapital og få det finansielle på plass til nye satsingar, blir også gjerne enklare med ein større aktør i ryggen, påpeiker Olsson.