NPK-NTB-Marius Helge Larsen: Regjeringa varslar ei utgreiing av anboda for kortbanenettet for fly. Dei vurderer mellom anna ulike prisar for turistar og fastbuande.

– Vi ønskjer å sjå nærare på korleis vi kan sørgje for at den store innsatsen frå staten kjem innbyggjarane til gode på ein endå betre måte enn i dag, seier samferdselsminister Jon-Ivar Nygård (Ap) til NTB.

Regjeringa har no lagt opp til å bruke nesten 2,4 milliardar kroner årleg på å halde oppe flyrutene i distrikta, dei såkalla FOT-rutene. Løyvinga vart dobla i år, og maksprisane vart halverte.

– I dag bidreg vi ikkje berre tungt til dei som bur i regionen, men også til reiseliv og turistane. Det kan hende det er rett, men det er sånne ting vi må vurdere. Er det vi driv med treffsikkert nok?

Ser til Mallorca: – Interessant
Det er Widerøe som har anbodet på nesten alle dei statleg subsidiert rutene.

Selskapet har merka auka trykk frå ferie- og fritidsreisande etter at prisane vart halverte.

I eit intervju med Brønnøysunds Avis førre veke foreslo Widerøe derfor eigne prisar for fastbuande, slik ein mellom anna har på Mallorca.

– Éin av dei tinga som har vore nemnde, er jo dette med bebuarbevis, som er kjent frå Spania. Det er litt ulike storleikar på Mallorca og Mehamn, men alle slike ting er interessant å sjå på, seier Nygård.

– Monopoltilstandar
Regjeringa er allereie i dialog med Widerøe om korleis det har gått etter priskuttet, men det er førebels ikkje aktuelt å ta umiddelbare grep.

– Vi har jo sagt at det vi gjer med prisane, kan føre til større etterspurnad enn vi har føresett, og då må vi eventuelt gjere justeringar. Men det er altfor tidleg å meine noko om det no. Så langt har det stort sett vore god tilgjengelegheit på FOT-rutene, også etter billettprisreduksjonen, seier samferdselsministeren.

Utgreiinga som regjeringa no set i gang, skal sjå på moglege endringar på anboda.

– Dette er jo eit kortbanenett, og det er veldig få som har den typen fly. Så i realiteten vil det jo vere éin aktør som peikar seg ut og tek ein veldig stor del av rutene, seier han.

Nygård meiner at dagens situasjon minner om eit monopol.

– Det at ein er i ein sånn situasjon med ein monopolist, skaper jo nokre utfordringar for oss. Derfor vil vi sjå på om det er alternative modellar for å regulere billettprisane, seier han.

Blir også vurdert på kommersielle ruter
Nygård påpeikar at det også har vore problem med høge prisar på distriktsrutene som ikkje får statsstøtte og drivast reint kommersielt.

– Når vi no har halvert maksprisane, betaler ein ein stad mellom 400 kroner og 1500 kroner for ei reise, litt avhengig av distansen. Det er jo ein stor nedgang. Men det gjeld jo ikkje for dei som er avhengige av å reise kommersielt.

– Der kan ein jo også sjå for seg at eit sånt bebuarbevis eventuelt kan vere ei løysing.