Rekord på rekord for Ramoen

Fabrikktrålaren Ramoen frå Ørsta sette nye rekordar i fjor, etter eit svært godt år i 2022.

Selskapet hadde kring 70 årsverk i arbeid med produksjon av sjøfrossen filet frå torsk, hyse og sei i Barentshavet, Norskehavet og Nordsjøen.

Inntektene steig endå nokre hakk frå rekordåret 2022. Det same gjorde overskotet, viser rekneskapen for 2023.

Omsetninga auka til 286 millionar og resultat før skatt enda på meir enn 66 millionar kroner (sjå tabell under).

Kostnadsauke og lågare kvoter
I årsrekneskapen kjem det fram at meir enn halvparten av salsinntektene til Ramoen i fjor kom frå England. Norge er nest største marknad, medan kring 20 prosent av inntektene kjem frå resten av Europa eller Asia.

Styret meiner både kvotegrunnlaget, den 2016-bygde trålaren og marknaden for produkta deira, gir eit godt grunnlag for dei komande åra.

Samtidig blir det peika på auke i kostnader, spesielt for drivstoff, saman med reduserte torskekvotar, som påverkar negativt.

– Dramatisk nedgang i innteninga
I årsmeldinga for Ramoen skriv styret at dei ventar eit godt år i 2024, men eit svakare resultat enn året før.

Ramoen-reiar Per Magne Eggesbø var samd i spådomen til ein Sparebank 1 SMN-analyse tidlegare i år – om resultatfall for kvitfiskflåten framover.

– Det er ein dramatisk nedgang i innteninga frå i fjor til i år, sa Eggesbø den gong.

Han rekna med at dei fleste fiskebåtreiarar vil drive fiske omlag som i fjor, og kanskje fiske meir reke for å halde aktiviteten oppe. Om situasjonen varar ved, trur han det vil tvinge seg fram at båtane vil ligge stille i periodar av året.

Store utbytter
Det blir teke til saman 20 millionar i utbytte etter det gode 2023-resultatet. Det same gjorde reiarlaget i fjor – medan det tidlegare år er teke ut fem millionar om lag annakvart år.

I 2008 blei Ramoen ein del av fiskerikonsernet Eros, som kjøpte 65 prosent av aksjane i selskapet. Per Magne Eggesbø blei då den største eigaren i selskapet, noko han framleis er.

Jill-Mari Eggesbø eig 17 prosent, medan Olga Eggesbø og Reidun Ann Eggesbø eig drygt 11 prosent kvar av Eros-aksjane.