Ser sjanse for å få bort CO2-avgifta

Med Møre og Romsdal Høgre sitt framlegg om å fjerne CO2-avgifta på diesel til fiskeflåten ser Jan Ivar Maråk i bransje- og arbeidsgivarorganisasjonen Fiskebåt ein sjanse for å få gjennomslag for Fiskebåt sitt primære standpunkt, at den særnorske avgifta må bort.

-CO2-avgifta fungerer ikkje for fiskeflåten når det ikke er noko alternativ å satse på, seier Maråk.

Han talar i staden for ei felles europeisk løysing for å redusere bruken av fossilt drivstoff som det einaste alternativet, mellom anna fordi ei felles løysing ikkje vil vere konkurransevridande. 

Bunkrar utanlands
I løpet av det siste året har det ifølgje Maråk skjedd ein markert auke i norske fiskebåtar som fylle drivstoff i utlandet, frå forsyningsfartøy i internasjonalt farvatn eller som nyttar høvet til å fylle avgiftsfritt i Noreg - som kan gjerast dersom dei deretter går til utanlandsk han og så startar fisketuren derifrå. Det er ein måte å omgå den særnorske avgifta på.

Inntil no har det vore eit så breitt fleirtal for CO2-avgift at Fiskebåt har konsentrert seg om å dempe dei økonomiske skadeverknadane av CO2-avgifta. 

Fiskeriminister Marianne Sivertsen Næss kom fiskarane i møte i statsbudsjettet i fjor haust, der kompensasjonen for auka avgift var like høg som auken i avgifta, men får fylkeslage til Høgre med seg heile partiet trur Maråk det kan vere starten på ei endrig som til slutt gir fleirtal for fjerne avgifta.

Auka avgift
I klimameldinga som regjeringa til Erna Solberg (H) la fram i 2021, varsla den gradvis auke i avgifta på utslepp av CO2 fram til 2030. Avgifta skulle bli nesten fire gangar høgare, som vil bety omlag ei dobling av drivstoffkostnadane for fiskeflåten frå 2021-nivået.

Dåverande klima- og miljøvernminister Sveinung Rotevatn (V) meinte fiskarane hadde god tid.

– Det er ikkje veldig mange rammevilkår for ulike næringar som vi gir signal om ti år fram i tid. Eg kjem faktisk ikkje på eit einasta eitt, så det er i utgangspunktet ein god tidshorisont, sa Rotevatn til Nett No.

La planar på is
For eitt år sidan kunne Nett NO fortelje at både fiskerbåtreiarlaget Loran på Godøya og Lerøy Havfisk i Ålesund hadde lagt vekk sine planar som skulle gi kraftig utsleppskutt.

Loran skulle satse på hydrogen og Lerøy Havfisk på ammoniakk som energiberar, men det blei for dyrt eller for teknisk krevande.