Silda er ikkje sunnmøring

(NPK): Fiskeridirektoratet har no undersøkt om silda i fjordane på Sunnmøre er lokale variantar. Resultatet viser at sildebestanden er av same sorten ein finn ute i havet og at han derfor ikkje vil bli freda.

– Etter grundige analysar konkluderer vi med at det ikkje finst vitskapeleg grunnlag for å seie at silda i desse fjordane er ein eigen variant, seier havforskar Aril Slotte i ei pressemelding.

Resultata viser tvert i mot at silda på Sunnmøre er ei god blanding av fleire genetisk ulike havbestandar og er veldig lik den i Nordsjøen og til dels det sørlege Norskehavet i vårhalvåret, når silda møtest i beiteperioden.

Lokale bestandar kunne gitt freding
Dersom forskinga hadde funne heilt lokale bestandar av sild i fjordane på Sunnmøre, altså at silda var tilpassa eit liv akkurat i dette området, så ville det vore eit vitskapeleg grunnlag for å gje råd om freding av silda her for å sikre mangfaldet i denne arten.

Dette rådet har havforskarane blant anna gitt for silda i Sognefjorden, Nordfjord og Trondheimsfjorden – med etterfølgjande reguleringar frå Fiskeridirektoratet. Men det finn altså ikkje forskarane grunnlag for på Sunnmøre.