Skal bruke 200 millionar for el-ferjer

Dette går fram av årsrapporten til selskapet.
Elferjene treng stor tilførsel av elektrisitet for å ladde opp batteripakkane som ferjene vert utstyrte med. Dette fører til at det på ei rekkje ferjekaier må gjerast omfattande utbyggingar.

Redusert utbyte

Mørenett har også på gang store investeringar i digitalisering, og styret har bestemt at utbyteprosenten frå selskapet vert betydeleg lavare for 2017 enn året før.
I fjor vart det utbetalt 85,9 millionar kroner i utbyte, medan årets utbytebetaling stoppar på 25,1 millionar.
Pengane går til eigarkommunane av Tafjord Kraftselskap og Tussa Nett, der Tafjord eig 53,66 prosent og Tussa 46,34 prosent.

Konsolidering

Sjølv om Stranda Energi nyleg avslo frieriet frå Mørenett, har ikkje Mørenett-direktør Rune Kiperberg gitt opp samanslåingar med naboselskap.

- Vi meiner at dette er rette vegen å gå, då dette vil tene både kundar, eigarar og tilsette, skriv han.
Mørenett har i dag rundt 65.000 kundar etter fusjonen i 2014 mellom Tafjord Kraftnett og Tussa Nett.
Selskapet har 139 fast tilsette etter at rundt 50 forsvann då BKK Enotek i fjor kjøpte ut deler av den konkurranseutsette verksemda, mellom anna ansvaret for veglys og ekom.