Spår dobling av cruise-trafikken i Nordfjord

Lefdal eig selskapet som handterer cruise-anløpa i Olden og har vore primus motor for å få ei ny cruisekai på plass i Nordfjord.
No håpar han på ei dobling av antall cruise-anløp i Nordfjord innan fem år. Det betyr i underkant av 200 anløp i året. Når Stad skipstunnel er ferdig reknar han med at det blir cruisekai også i Selje/Måløy. Då blir potensialet 250-300 anløp i året, meiner Lefdal. Det vil i så fall bety at Nordfjord samla sett nærmar seg Bergen i antal skipsanløp.

Fullt ved kaia

I dag er kapasiteten ved cruisekaia i Olden nær fullt utnytta i høgsesongen. Det er noko av bakgrunnen for at Lefdal lenge har meint at det er marknad for nok ei cruisekai i Nordfjord.
No har selskapet Seawalk Nordfjord kjøp ei foldbar cruisekai som skal fraktast og settast opp ved Nordfjord. Bak Seawalk Nordfjord står John Olav Lefdals selskap Lefdal Invest, cruiseagenten Arthur Kordts selskap Cruise Ventures og Eid kommune.

Startar marknadsføring i dag

Kordt seier marknadsføringa av den nye cruisekaia startar i dag. Innsatsen vil først og fremst vere retta mot 2018-sesongen, men Kordt meiner dei første cruiseskipa kan legge til kai allereie i sommar.
- Vi har gode tilbakemeldingar frå marknaden om at dei (cruisereiarlaga, red. merk) gjerne vil anløpe Nordfjordeid, seier Kordt.

Nye attraksjonar

John Olav Lefdal meiner nye attraksjonar, som gondolbanen i Loen, Vikingmuseet Sagastad på Nordfjordeid, og Stad skipstunnel vil vere med på gjere Nordfjord til eit meir fristande reisemål.
Marita Sylvi Lindvik i reiselivsselskapet Visit Nordfjord meiner ei ekstra cruise-kai i Nordfjord er bra for reiselivsbransjen i regionen.
-Det vil bety at vi kan få fleire båtar. Dess fleire gode investeringar og tiltakt dess betre er det, seier Lindvik.