Større terminal og meir servering

Flyplassen på Vigra har hatt kraftig trafikkvekst siste åra, spesielt etter at det kom ei rekkje nye utanlandsruter. No tek konsernleiinga i Avinor affære og rustar opp flyplassen for 60 millionar kroner.
Dette opplyser Avinor i ei pressemelding torsdag.

Ferdig neste sommar

Avinor opplyser at anleggsarbeidet vil starte opp i løpet av få veker. Etter planen skal den nye terminaldelen stå ferdig sommaren 2015.
Avinor seier at det er den kraftige passasjerveksten ved Vigra dei fire siste åra som har gjort det nødvendig å auke kapasiteten i terminalen.

300.000 pluss på fire år

Mellom anna har talet på terminalpassasjerar auka med over 300.000 i perioden 2009-2013. Veksten held også fram i 2014.
- Når den utvida terminalen vert tatt i bruk sommaren 2015, vil kundane få ei mykje bedre oppleving på Ålesund lufthamn, Vigra, seier divisjonsdirektør Margrethe Snekkerbakken.

Meir servering

Kapasiteten i sikkerhetskontrollen vil også verte større, og dei reisande vil få tilbud om fleire nye serveringsstadar inne i avgangsområdet.
- På grunn av mange viktige investeringsprosjekt i konsernet har det vore krevjande å få beslutninga på plass. Dette er dog eit svært viktig prosjekt for våre kundar, og lufthamna har vist over år at dei evnar å levere godt.
- Det har vore viktig for heile leiinga i konsernet at dette prosjektet vert prioritert, seier Snekkerbakken.