Sidan 2016 har grunnleggaren Rolf Hjelle arbeidd med ideen om ein høgt automatisert fabrikk som kan gjere kutte- og sveisearbeid som i dag blir gjort i Aust-Europa og Kina - og konkurrere på pris.

Går alt etter planen har selskapet 3D Welding ein fabrikk ferdig og produksjonsklar tidleg i 2023. Fabrikken blir på 2800 kvadratmeter i første byggesteg. Det blir arbeidd med ei løysing på Melsgjerdet industriområde i Ørsta.

Har kundar på plass

3D Welding har allereie to store kundar på plass, som gir selskapet 90 millionar kroner i årlege inntekter frå start.

Med den eine, eit selskap som byggjer mellom anna industrihallar, har 3D Welding ein femårig avtale om å bygge takkonstruksjonar i stål, som vil gi 75 millionar kroner i årlege inntekter. Partane har ein avtale om å førebels ikkje opplyse kven som er kunden. Kunden har ein opsjon på å forlenge avtalen med ytterlegare fem år. Ein av grunnane til at kunden vil ha ein norsk produsent er reduserte CO2-utslepp. Norsk produksjon sparer utslepp frå transport og produksjon, og 3D Welding si berekning er at det er snakk om ein reduksjon på over 80 prosent.

Den andre avtalen er med P E Bjørdal i Ørsta. 3 D Welding vil bearbeide stålkonstruksjonar i svartstål for P E Bjørdal.

15 tilsette

Hjelle seier planen er å ha om lag 15 tilsette første driftsår og at selskapet er i ferd med å oppbemanne fram mot opninga, Per i dag er Kay Robot Yksnøy og Ole-Martin Steinnes tilsett , og det er også dei saman med Hjelle som har utvikla produksjonsstyringsystem og korleis fabrikken er sett opp.

Fabrikken og produksjonslinene er bygd, testa og utvikla i ein virtuell versjon, slik at feil er oppdaga og endra før den fysiske bygginga startar.

Fabrikken er også bygd slik at arbeidsteikningane til kundane kan leggast rett inn i produksjonssystemet og dermed spare seg ein programmeringsoperasjon.

100 millionar

Fabrikken, med bygg og produksjonsutstyret, vil koste om lag 100 millionar kroner.

Innovasjon Norge går inn med 9,5 millionar kroner i tilskot, og er saman med Sparebank 1 Søre Sunnmøre med på eit lån på 25 millionar kroner.

Det blir arbeidd med ei kapitalutviding der det skal hentast inn fire millionar kroner, og mellom andre P E Bjørdal - der Rolf Hjelle i dag er driftsleiar - blir ein av medeigarane. Bygget skal eigast av eit eigedomsselskap, som er under etablering.

Hjelle sjølv blir også medeigar.

Rekruttere yrkesskuleelevar
For å sikre seg kvalifiserte folk til den nye fabrikken vil 3D Welding starte rekrutteringsarbeidet i yrkesskulen, allereie før elevane kjem til læretida.

Elevar på andre årstrinn får tilbod om å søke på trainee-stillingar, der 3D Welding er med på å legge til rette for kursing gjennom skuleåret, før neste steg er læreplass og eventuelt fast jobb.