– Staten må slutte å overkøyre dei små

Venstre sin næringspolitiske talsperson, Alfred Bjørlo, reagerer på at finansdepartementet vil avvise søksmålet frå Lars Oscar Øvstegard og andre norske småbedriftseigarar. 

Ørstingen vil som kjent saksøke den norske staten for å få fjerna formuesskatten på arbeidande kapital. 

Nett No omtala måndag svaret frå departementet, som mellom anna argumenterer med at saka ««mangler rettslig interesse». 

– Eg blir skikkeleg opprørt på vegne av Lars Oscar Øvstegard og andre norske småbedriftseigarar som må betale skattar for pengar dei ikkje har og som utanlandske eigarar slepp – og no på toppen av alt blir forsøkt nekta av Finansminister Jens Stoltenberg (Ap) å prøve saka rettsleg. Slik kan vi ikkje ha det. Staten må slutte å overkøyre dei små, seier Bjørlo i ei pressemelding frå partiet. 

Tek opp saka i Stortinget
Bjørlo tek no saka opp i Stortinget der han vil utfordre finansminister Jens Stoltenberg om formuesskatten - og svaret frå departementet.

– Jens Stoltenberg har nettopp advart i svar til Stortinget om at formuesskatten ikkje bør innførast for utanlandske eigarar, fordi den kan «skade investeringer og kapitalflyt». Men den same Stoltenberg meiner altså at det er heilt greitt å pålegge denne skatten på norske eigarar, påpeiker Bjørlo. 

I eit skriftleg spørsmål til finansministeren i Stortinget, vil Bjørlo vite korleis Stoltenberg forsvarar dette. 

Ber regjeringa sleppe til søksmålet
Vidare skriv venstrepolitikaren at han meiner det verste, er at staten vil forsøke å nekte søksmålet tilgang til retten. 

Bjørlo oppmodar regjeringa til å sleppe til søksmålet «utan at eit kobbel av juristar i Stoltenberg sitt mektige departement skal prøve å stoppe det». 

Søkmålvarslet blei sendt til departementet i mars, av advokat Jan Magne Langseth som i vinter slutta seg til det juridiske teamet Øvstegård har på si side. 

Langseth som tidlegare har ført den mykje omtala Nav-saka i retten, meiner svaret frå departementet et eit nytt døme på at staten prøver å hindre «den lille mann i å gå til sak mot staten».  

Ettersom Øvstegård er busett i Ørsta, vil søksmålet bli lagt til Møre og Romsdal tingrett.