Statkraft stoppar ny havvindsatsing

NPK-NTB: Statkraft trekkjer i bremsen på nye prosjekt, og seier det kan bli aktuelt med nedbemanningar. Den nye strategien droppar havvind og hydrogen

Statkraft oppdaterer strategien sin etter å ha varsla nedsal i fleire land. Dei stoppar arbeidet med nye havvindprosjekt og hydrogen, medan vatn, sol og batteri blir prioritert.

Samtidig varslar dei at det kan bli aktuelt med nedbemanningar på grunn av uvisse og endringar i marknadene, skriv E24.

Dei planlegg å redusere kostnadene innan 2027 med rundt 15 prosent av kostnadsestimatet for 2025. Dei vil spare rundt 2,9 milliardar kroner i året.

– Statkraft må tilpasse seg ein marknad i endring og auka geopolitisk uvisse. Dessverre påverkar dette også tilsette, som er vår viktigaste ressurs, seier konsernsjef Birgitte Ringstad Vartdal i ei melding.

Spissar satsingsområda
For å komme i mål med kostnadskutta inneber den nye strategien at Statkraft ikkje vil operere like breitt som før.

I fjor fall resultatet frå selskapet med rundt 36 prosent, og dei varsla at dei kom til å ta strategiske grep. Det vart også gjort endringar i leiinga.

– Ved å konsentrere oss om kjerneaktivitetane og prioritere investeringar som gir tidleg lønnsemd, kan vi sikre framleis vekst og verdiskaping for selskapet, og samtidig bidra mykje til energitryggleik og -omstilling i Norden, Europa og Sør-Amerika, seier Statkrafts konsernsjef Birgitte Ringstad Vartdal i ei pressemelding.

Droppar Utsira Nord
Eit av tiltaka er å droppe havvind-prosjektet i Utsira Nord, men dei går vidare med havvindprosjektet North Irish Sea Array i Irland.

Vartdal seier havvind vil spele ei viktig rolle i Europas energimiks, men at utviklinga ikkje har gått så fort som venta.

Selskapet anslår at investeringane dei neste åra blir på mellom 16 og 20 milliardar kroner i året.

– Investeringane vil konsentrerast om dei store effektoppgraderingane og behova for vedlikehald av vasskrafta i Noreg, vindkraftutvikling i Noreg og Sverige og den store porteføljen av meir enn 500 prosjekt innan sol, vind og batteri i Europa og Sør-Amerika, heiter det i pressemeldinga.

Tidlegare i år vart det også kjent at dei stoppar utviklinga av nye, grøne hydrogenprosjekt.