Stoltenberg: Kutt i CO2-avgifta truleg ulovleg

(NPK-NTB): Dialog med Esa tyder så langt på at avgiftskutta for drivstoff er ulovleg statsstøtte, seier finansminister Jens Stoltenberg (Ap).

– Vi har hatt tett dialog med Esa som er overvakingsorganet for EØS-avtalen. Dei stadfestar at det er stor risiko for at desse avgiftskutta er ulovleg statsstøtte. Då risikerer vi å påføre dei bedriftene vi ønskjer å hjelpe, ei belastning i staden for, seier Stoltenberg til VG.

1. april vart det kutta i drivstoffavgifter, mellom anna vegbruksavgifta, noko som gav billigare bensin og diesel.

Fem kutt står att, mellom anna for diesel og næringslivet. Det er planlagt at desse skal innførast 1. mai. 

Har orientert Stortinget
Stoltenberg har orientert Stortinget om at kutta mest sannsynleg utgjer ei ulovleg statsstøtte, skriv NRK. Det vil innebere at bedriftene står i fare for å måtte betale tilbake det dei har spart. 

Kutta vart gjennomførte av Stortinget rett før påske då Senterpartiet gjekk saman med Høgre, Frp og KrF.

– Då saka vart debattert i Stortinget før påske, og før vedtaket vart gjort, var eg tydeleg på at desse vedtaka kunne innebere ulovleg statsstøtte, skriv Stoltenberg i brevet.

Samtidig understrekar Stoltenberg at han vil gjennomføre avgiftskutta uansett – fordi regjeringa ikkje har lov til anna.

– Underleg å vente
– Det er Stortinget som bestemmer skattar og avgifter i Noreg. Vi kan ikkje krevje inn nokon avgifter eller skattar som ikkje er vedtekne. Det er bestemt i Grunnlova, seier han.

Han er likevel misfornøgd med at regjeringa fekk for kort tid til å greie ut saka. Saka om CO2-avgiftene hadde vorte greidd ut av fleire finansministrar før Stoltenberg, utan at dei fekk godkjenning.

– Då er det litt underleg å vente at det dei brukte mange år på å ikkje få til, det skal eg få til på nokre veker. Spesielt fordi Noreg der hadde ei god sak, men her har vi ei vesentleg dårlegare sak, seier Stoltenberg.

(©NPK)