Stor auke for saltfisk, laks og reke

NPK-NTB-NETT NO: – Dette er den beste eksportmånaden for norsk sjømat nokosinne. Eksportverdien for oktober i år er 600 millionar kroner, eller 6 prosent, over førre verdirekord frå oktober 2016, seier administrerande direktør Renate Larsen i Noregs sjømatråd.
Det samla eksportvolumet var 12 prosent lågare i oktober enn i same månad i fjor, men verdien av sjømateksporten auka med 10 prosent.

80,7 milliardar

Hittil i år har Noreg eksportert 2,2 millionar tonn sjømat til ein verdi av 80,7 milliardar kroner – 6 prosent auke i volum og 4 prosent, tilsvarande 3,2 milliardar kroner, i verdi.
Også norske lakseeksport nådde ny «all time high» i oktober, ifølgje Sjømatrådet. 104.000 tonn laks for 6,5 milliardar kroner blei sendt ut av landet.
– Oktober månad slår alle rekordar, og det har fleire årsaker. Det var ein litt svak septembermånad, men eksporten har tatt seg kraftig opp no i oktober.
- Polen og Nederland, som først og fremst er vidareforedlingsmarknadar, hadde i oktober ein volumvekst på høvesvis 43 og 29 prosent, seier sjømatanalytikar Paul T. Aandahl i Noregs sjømatråd.

Laks for 55 milliardar

Den norske lakseeksporten auka i volum med 8 prosent og i verdi med 15 prosent, tilsvarande 827 millionar kroner, frå oktober i fjor. Aandahl meiner prisauken kjem av at etterspørselen etter norsk laks igjen veks internasjonalt. Polen og Frankrike var dei største marknadane for laks.
Hittil i år har Noreg eksportert 862.000 tonn laks for 55,8 milliardar kroner. Det er ei volumauke på 7 prosent, mens verdien auka med 5 prosent eller 2,5 milliardar kroner, frå same periode i fjor.
Også ørreteksporten auka, og enda i oktober på 4.300 tonn til ein verdi på 293 millionar kroner. Hittil i år er det eksportert 36.000 tonn ørret til ein samla verdi på 2,4 milliardar kroner.

Auke for salt- og klippfisk

For klippfisk- og saltfiskeksportørane vart oktober ein god månad. Totalt vart det seld 10.400 tonn klippfisk for 500 milionar kroner.
Hittil i år er klippfiskeksporten på 75.000 tonn og samla verdi på 3,5 milliardar kroner.
Portugal og Brasil er dei store mottakarane av norsk klippfisk.
For saltfisk har det vore endå større auke, og også her er det Portugal som tek imot mest, saman med Italia.
I oktober vart det eksportert 2.000 tonn saltfisk til 99 millionar kroner, ein auke på 21 prosent i høve til oktober i fjor.

Auke for fryst torsk

Eksportverdien av fersk torsk gjekk ned med 18 prosent, trass gode prisar. Totalt vart det eksportert 1.600 tonn fersk torsk til ein verdi av 73 millionar kroner i oktober.
For fryst torsk, inkludert filet, var det derimot ein liten auke, der det vart eksportert .5600 tonn til ein verdi av 232 millionar kroner.
Hittil i år er det eksportert fryst torsk for 57.000 tonn til ein samla verdi på 2,1 milliardar kroner, der Storbritannia og Kina er dei store importørane.

Mindre sild - meir reke

Sildeeksporten gjekk ned i oktober, og landa på 16.500 og 183 millionar kroner, medan det var ein kraftig eksportauke for reke.
Totalt vart det eksportert 2.200 tonn reke for totalt 119 millionar kroner.