Stor interesse for ny RR-vinsj

- Mange har vist stor interesse, og tilbakemeldingane har vore positive etter at motoren blei frigitt for sal tidlegare i år.
Det seier Svein Hatlehol Henjesand som er salssjef av Rolls-Royce dekksmaskineri til fiskebåtar i Norge.
Henjesand har stor tru på at den nye vinsjen, som har fått betegninga BRE XT140, vil sette ny framtidig standard for elektriske trålvinsjar.

Eit Brattvåg-produkt

Det er Rolls-Royce Marine si avdeling for dekksmaskineri i Brattvåg som har utvikla den nye elektriske motoren basert på PM-teknologien (permanent magnetisk). Motoren er spesielt utvikla for ankerhandtering og tråling, der behovet for god dynamikk og hastigheit på trommelen er viktige føresetnader.
Motoren blir produsert i Brattvåg, der Rolls-Royce no byggjer opp produksjons- og servicekompetanse, samt reservedelslager inkludert komplette motorar.
- Dette vil gi oss god og rask responstid, seier Henjesand, som er glad for å kunne tilby dei beste og mest driftssikre løysingene uavhengig av kva slags drivesystem kunden ønskjer.

Eit elektrisk alternativ

Grunnen til utviklingsarbeidet er ifylgje Henjesand eit ønskje om å gi vinsj-kundane eit elektrisk alternativ til den elles så velkjende hydrauliske lavtrykksmotoren MX132.
Han forklarar at verkingsgraden for elektriske vinsjer er noko betre enn hydrauliske, samtidig som det er muleg å bruke den regenerative straumen frå vinsjene tilbake på skipsnettet.
Behovet for ei girkasse med høg utveksling mellom trommelen og motoren, er ein ulempe med dei tradisjonelle elektriske vinsjane.
- Dette har vi no løyst med denne nye PM-motoren som har høgt moment utan girkasse, seier Henjesand.
Den første trålaren med den nye PM-motoren blir bygd på Vard Aukra og skal leverast til canadisk reiar rundt nyttår 2016/2017.