Store ressursar igjen på norsk sokkel

(NPK-NTB-Fredrik Moen Gabrielsen): Sokkeldirektoratet, som i år skifta namn frå Oljedirektoratet, har analysert tal og verksemd i perioden 2004 til 2023.

Netto kontantstraum frå leiteverksemda i dei 20 åra blir berekna til 2000 milliardar kroner i dagens verdi. Verdien av funna som er gjorde, er over tre gonger høgare enn kostnadene brukt på leitinga.

Alle leiteinvesteringar frå denne perioden er allereie nedbetalte av funna som er sette i produksjon.

– Om lag 50 av 190 funn er bygde ut og i produksjon. Det inneber at det framleis står att å produsere om lag tre firedelar av ressursane som er funne i desse åra. Investeringane vil halde fram med å gi avkastning etter kvart som fleire funn kjem i produksjon, skriv direktoratet.

– Kan føre til rask nedbygging
Dei siste fem åra er verdien av funna som er gjorde, over dobbelt så stor som leitekostnadene. Årsaka til lønnsemda er at funn som til dømes Troll-området i Nordsjøen kan koplast på eksisterande infrastruktur.

Og det er framleis store olje- og gassressursar igjen på norsk sokkel, ifølgje rapporten.

– Det kan gi grunnlag for produksjon, eksport og verdiskaping for samfunnet i lang tid. Ei slik utvikling krev at det framleis blir leita og investert meir i felt, funn og infrastruktur. Manglande investeringar kan føre til rask nedbygging av petroleumsverksemda, heiter det.

Skisserer tre framtidsscenario
Sokkeldirektoratet skisserer tre ulike scenario for olje- og gassleitinga fram mot 2050.

– Alle dei tre moglegheitsbileta viser nedgang i produksjonen, men kor fort det skjer avheng mellom anna av tempo i leiteaktivitet og teknologiutvikling. Produksjonsnedgangen i dei tre moglegheitsbileta er i tråd med ei vellykka oppfølging av Parisavtalen, skriv direktoratet.

I det eine scenarioet, som dei kallar «moglegheitsbilete basis», blir det gjort nye funn på norsk sokkel, som blir sett i produksjon. Det blir halde fram med å bli investert, men ressurstilveksten blir likevel ikkje stor nok til å motverke at produksjonen minkar gradvis i takt med frå dei store felta.

I «moglegheitsbilete høg» førar høg leiteaktivitet, mange raske funn, rask teknologiutvikling og investeringsvilje til ein bremsa produksjonsnedgang – og dermed nedgang i inntektene til staten fram mot 2050.

– I moglegheitsbilete låg vil låg leiteaktivitet og manglande investeringsvilje føre til ei rask nedbygging av petroleumsverksemda og føre til eit stort fall i inntekter til staten.