Støre forsvarte havvindsatsing

(NPK-NTB): Statsminister Jonas Gahr Støre (Ap) står fast ved at havvind er ei stor moglegheit for norsk industri.

Støre tok havvindsatsinga i forsvar då han vart utfordra av Frp-leiar Sylvi Listhaug i spørjetimen til Stortinget onsdag.

– Milliardane berre renner ut av statskassa, sa Listhaug, som omtaler den planlagde støtta til havvindutbygging som «eit tjukt sugerøyr ned i statskassa».

– Arbeidarpartiet har brukt og vil bruke 58 milliardar kroner, estimert. I tillegg kjem det millionar og milliardar til hydrogensatsing, batterifabrikkar, karbonfangst og lagring, sa Listhaug.

Stoltenberg forstår tvil rundt havvindsatsing
Spørsmålet om lønnsemda ved havvindsatsinga er også løfta fram av finansminister Jens Stoltenberg (Ap). I eit intervju med DN svarer han «det gjenstår å se» på spørsmål om han trur prosjekta blir lønnsame. Og han uttrykkjer forståing for at det kjem signal frå næringslivet om tvil rundt prosjekta.

Han går også langt i å forklare satsinga på havvind med bakgrunn i interessefellesskap mellom industrien og fagrørsla, næringslivsorganisasjonar og delar av miljørørsla.

– Det viktigaste styresmaktene gjer er ikkje å subsidiere det vi liker, men å skattleggje det vi ikkje liker, seier Stoltenberg til avisa. Hans råd vil vere at ein ikkje legg opp til noko som inneber varige store subsidiar.

– Ikkje eit eventyr
– Trur statsministeren framleis at havvind er starten på eit industrieventyr? Og trur han at dette er starten på ein norsk verdsindustri, spurde Listhaug då ho plukka opp tråden i spørjetimen.

Støre tok havvindsatsinga i forsvar.

– Ja, eg trur havvind kjem til å vere ein del av framtidas energiløysing. Eg trur ikkje det kjem til å vere eit eventyr. Eg trur det kjem til å vere ein ganske hard realitet av stor viktigheit, og eg trur det er store moglegheiter for norsk industri, svarte han.

Han argumenterte for at havvind vil kutte klimagassutslepp og bidra til å nå Noregs klimamål, samtidig som det også vil skape jobbar.

– Og vi skal leie an i oppstart til nokre viktige teknologiar som kan møte dette. Det er det å ha politisk ansvar, sa han.

(©NPK)