Superresultat for Stokke

Årsrekneskapen til Stokke-konsernet viser at barneutstyrsprodusenten hadde eit rekordår på fleire vis i fjor.

Omsetninga var rekordhøg og nærmar seg no to milliardar, etter ein vekst på meir enn 300 millionar i fjor. Også lønnsemda har skote i veret dei siste åra.

Eit driftsresultat på 353 millionar kroner, er også ny rekord - og gir ein driftsmargin på heile 18 prosent.

– Styret ventar framleis lønnsam vekst i 2021, heiter det i årsrapporten.

(saka held fram under)

Stor auke i USA og Asia
Stokke sel framleis desidert mest av produkta sine i Europa, og knapt 1,2 milliardar av omsetninga kom her.

I fjor hadde selskapet også kraftig vekst i både Asia og USA. Salstala i desse marknadene enda på høvesvis 437 og 244 millionar kroner i fjor. I Norge var salet stabilt.

Stokke er eigd av sørkoreanske NXC. Hovudkontoret er i Ålesund, og konsernet har ulike støttefunksjonar i fleire land.

Færre tilsette
Samtidig som lønnsemda har auka, har det vorte færre tilsette i konsernet det siste året.

I fjor hadde Stokke eit snitt på 312 heiltidstilsette, som er nær 70 færre enn året før. Den største reduksjonen har skjedd i avdelingane i utlandet, men også i Norge er det forsvunne 24 årsverk det siste året.

I 2019 hadde konsernet 108 tilsette i Norge, medan dei no er nede i 84 årsverk.

Titals millionar på effektivisering
Stokke har brukt fleire titals millionar på effektivisering dei siste åra, etter at både sal og lønnsemd fekk seg ein knekk i 2018. Konsernet gjekk mellom anna vekk frå satsinga med eigne butikkar.

Resultata av desse grepa starta å vise seg allereie i 2019, og ga ny gevinst i fjor. Også i 2020 er det bokført meir enn 30 millionar kroner til restruktureringsprogrammet.

Styre viser i årsrapporten at lågare utgifter som følgje av effektiviseringsgrepa, er hovudårsaka til den auka lønsemda. Samtidig førte koronapandemien til mindre reising og utsette aktivitetar i fjor.