Sølvtrans byggjer endå ein brønnbåt

Dette opplyser verftet i ei pressemelding måndag.
Den nye brønnbåten er av verftet sitt eige design, type AAS 1802 ST, med ein lastekapasitet på 1800 kubikkmeter og spesielt tilpassa reiarlaget sitt sirkulasjonsprinsipp med sidevegs sirkulasjon i lasteroma og lukka transport.
Den nye båten er eit søsterskip til eit nybygg som Vestnes-verftet har under bygging for Sølvtrans, eit skip som skal leverast i april 2016.
Verftet opplyser at skroget til nybygget skal byggast i utlandet og kome til Vestnes i juni neste år for utrustning. Båten skal overleverast til reiarlaget i januar 2017.

Vil byggje mange båtar

Sølvtrans har frå før ein brønnbåt under bygging ved Kleven-verftet Myklebust, med opsjon på ein til.
Sølvtrans-direktør Roger Halsebakk opplyste i samband med denne kontrakten at selskapet vil byggje mange nye brønnbåtar.

UV-behandling

I pressemeldinga vert det opplyst at den siste båten vert utstyrt med UV-system for vassreinsing for semilukka transport, der sirkulert vatn inn eller ut av lasteroma vert filtrert og desinfisert ved hjelp av UV-behandling.
Nybygget vert også utstyrt med filteranlegg på all sirkulasjon for utskilling av lus ved avlusing av fisken, system for avsiling av sjøvatn og ferskvatn ved lasting og lossing i forbindelse med avlusing og AGD-behandling ved bruk av ferskvatn.
Nybygget er designa for å trykklosse til anlegg på land, til sorteringsmaskin og liknande, utan bruk av vakuumpumpe for mest mogleg skånsom behandling av fisken.

270 tonn levande fisk

Lengda på båten vert 69,86 meter og breidda 12 meter.
Lasteromsvolumet er på 1800 kubikkmeter som gir ein kapasitet på føring av 270 tonn med levande fisk.
Lasteromet er fordelt på to fiskebrønnar, som er utstyrte med skyveskott og trykklast- og lossesystem.
Båten vil ha innreiing for 10 personar.
Nybygget er den 13. brønnbåten frå verftet til Sølvtrans.
Sist fredag leverte verftet ein ny brønnbåt til Bømlo Brønnbåtservice, båt nummer 14 til dette reiarlaget.