Tar grep etter stort minus for kafé

Det første driftsåret for Millennium Kafé på Hareid i fjor, enda med dundrande underskot, viser den ferske rekneskapen. Eigarane satsar likevel vidare – men gjer justeringar.

– Det er inga hemmelegheit at året 2025 har vore eit økonomisk tøft oppstartsår som har vore prega av høge eingongsinvesteringar, fortel styreleiar Kim Lillebø til Nett No. 

Han fortel at det samtidig har vore ei lærerik oppleving å sluttføre eigedomsprosjektet og få på plass alle leigetakar. 

Går inn med lån
Lillebø og familien har satsa betydelege midlar på Millennium-bygget gjennom Brakali Group. 

Etter ei omsetning på 4,4 millionar kroner, enda rekneskapen for kafé-selskapet opp med eit minusresultat før skatt på drygt 3,5 millionar for 2025. 

No låner morselskapet tre millionar til i kafé-selskapet for å halde fram drifta, går det fram av årsrekneskapen. 

Legg om opningstidene
Frå mai legg dei også om opningstidene til å passe betre med besøket. Frå då vil dei opne nokre timar seinare på formiddagen, og stenge en time tidlegare på ettermiddagen. 

– Når vi no har eit komplett driftsår, så ser vi på statistikkane at vi har svært få kundar tidleg på morgonen, og seint på ettermiddagen, fortel Lillebø. 

Får gode tilbakemeldingar
Lillebø fortel at dei som investorar er innforstått med at dei må ha tolmod for å få økonomi i det nye tilbodet. Samtidig er han tydeleg på at Millennium Kafe spelar ei sentral rolle for totalkonseptet i det nye bygget.

– Det å bygge ein ny kafekultur tek tid, seier han.  

– Vi måler høg tilfredsheit blant bedriftene som leiger kontor og møterom med oss, og tilbakemeldingane Millennium Kafe får frå sine gjestar er også svært positive, legg Lillebø til.