Oppdatert: Seint onsdag ettermiddag varslar næringsminister Iselin Nybø (V) at ho vil vurdere ei regelendring som følgje av saka.
– Sidan både Hurtigruten og Sjøfartsdirektoratet i dag har vurdert at eit NIS-skip kan liggje i hamn og utøve næringsverksemd utan å komme i konflikt med reglane, ser eg no at regelverket ikkje er tydeleg endå, seier Nybø til VG.
– Eg vil difor ta eit raskt initiativ til ei forskriftsendring, slik at det blir endå tydelegare at NIS-registrerte skip ikkje kan drive hotellverksemd i norske hamner, legg ho til.
Statsråden gir eit likelydande til stortingspolitikar Terje Aasland (Ap) som har spurt om saka i Stortinget (sjå under).

Ber departementet ta grep

Tysdag blei det kjent at Fellesforbundet og Sjømannsforbundet har meldt Hurtigruten til politiet for brot på utlendingslova og levert ei bekymringsmelding til Sjøfartsdirektoratet, for bruken av MS Fridtjof Nansen til innspeling av filmen Mission Impossible.
Etter at Sjøfartsdirektoratet svarte at dei meiner bruken er innafor regelverket for NIS-skip, tok organisasjonane kontakt med næringsdepartementet.
- Vi ber næringsdepartementet overprøve Sjøfartsdirektoratet si avgjersle, og vil at skipet blir sletta frå NIS-registeret og overført til NOR-registeret i staden, fortel advokat Terje Hernes Pettersen som representerer dei to foreiningane, til NETT NO.
Filmselskapet har leigd skipet for éin månad, og det ligg i desse dagar til kai i Hellesylt. Om bord skal det i hovudsak vere filippinsk mannskap. Bakgrunnen for varselet til direktoratet er at det ikkje er lov å operere mellom norske hamner med mannskap tilsett etter internasjonale vilkår.

Les også:

- Ikkje brot på reglane

Kommunikasjonsdirektør Dag Inge Aarhus i Sjøfartsdirektoratet fortel til NETT NO at dei har fått forsikringar frå Hurtigruten om at dei vil halde seg innafor regelverket.
- Vi tek ikkje stilling til dette med lønnsnivå og slikt, men vurderer forholdet til NIS-lova. Den seier at så lenge skipet ikkje går frå hamn med passasjerar om bord, så er det ikkje brot på reglane, fortel han.
Reiarlaget har forklart at når skipet skal flyttast, så vil det skje utan passasjerer om bord, ifølgje Aarhus.

Politiet kan kontrollere skipet

Møre og Romsdal politidistrikt vil onsdag ikkje uttale seg om korleis dei ser på saka, men viser til ei uttale frå seksjonsleiar Svein Rike ved Utlendings- og grensekontroll til VG tysdag.
Han opplyste at politiet var kjent med saka, og ikkje utelukka at det ville skje ein kontroll av fartøyet.
Anne Marit Bjørnflaten som er direktør for myndighetskontakt i Hurtigruten seier til at dei meiner saka er ei konstruert sak. Ho viser til at bruken ikkje kan defineres som hotellverksemd, fordi det kun er filmselskapet sine tilsette som bur på skipet, og at heile fartøyet er charta av filmproduksjonen.

Spør statsråden i Stortinget

Stortingsrepresentantane Sylvi Listhaug (Frp) og Terje Aasland (Ap) har også teke opp saka i kvar sine spørsmål i Stortinget til næringsminister Iselin Nybø.
Listhaug ber kort og godt Nybø om å gjere reie for korleis hotellverksemda ved MS Fridtjof Nansen er i tråd med regelverket.
Ho meiner også at Hurtigruten burde henta tilbake nokre av sine norske tilsette for å gjere jobben om bord på ekspedisjonsskipet, i staden for å nytte utanlandske arbeidarar.
- Eg synest det er utruleg dårleg dømekraft av Hurtigruten når vi veit at det mange norske sjøfolk er permitterte i desse dagar, seier ho til VG.
Stortingsrepresentant Aasland vil også vite om det er anledning til å operere slik Hurtigruten gjer med ei skip registrert i NIS-registeret.
Les Fellesforbundet og Sjømannsforbundet (ekstern lenke)