Tussa blir størst i Istad Kraft

Tussa-sjef Elling Dybdal vil bygge større og sterkare kraft- og nettselskap i Møre og Romsdal. Kjøpet er gjort ut frå den målsettinga, i følgje Dybdal. Alternativet er at selskap utanfrå set seg i førarsetet.
- Det er betre at vi tek initiativet og samordnar oss i fylket, seier Dybdal.

Mellom 300 og 500 millionar

Partane i handelen vil ikkje gå ut med prisen på transaksjonen.
Dybdal seier det er snakk om ein investering som er mindre enn Tussa har gjort i fiberkabellegging (500 millionar kroner) og prisen Tussa betalte då Ålesund kommune sin aksjepost på 26 prosent i Tussa vart kjøpt ut i 2005 (323 millionar kroner).
Kjøpet er finansiert med lån.

Større

Tussa har ein produksjon på 680 GWh i eit normalår, Istad Kraft ein produksjon på 196 GWh.
Tussa er medeigar i nettselskapet Mørenett saman med Tafjord, og Tussa blir no indirekte eigar i Istad sitt datterselskap Istad Nett as.
Istad Kraft og Istad Nett er dei klart største selskapa i Istadkonsernet. Driftsinntektene deira var høvesvis 383 og 219 millionar kroner i 2017. Resutatet før skatt blei 42 millionar kroner for Istad Kraft og 22 millionar kroner for Istad Nett.

To-tre månadar

Dybdal seier Tussa og Istad har forhandla om handelen i to-tre månadar.
No må dei formelle godkjenningane på plass før kjøpet er i boks.
Istadkonsernet har to andre eigarar, Molde kommune (34 prosent) og Moldekraft (17 prosent).
Tussa er eigd av ei rekkje kommune på Søre Sunnmøre og KLP.