Nytt rekordår for Brunvoll

Artikkelen er oppdatert fredag 16. mai, etter at årsmeldinga til konsernet for 2024 vart offentleg tilgjengeleg.

Brunvoll i Molde har auka inntektene med 50 prosent på to år. I Volda er inntektene meir enn dobla i same periode. 

Begge dei to produksjonsselskapa i Brunvoll-konsernet tilsett fleire folk i fjor, og ventar inntektsvekst også i 2025, ifølgje dei ferske årsmeldingane. 

Ordreinngangen i fjor var høgare enn åra før både for Molde- og Volda-selskapet i gir- og propellkonsernet, fortel dei i årsmeldingane for 2024.

I Molde er det vekst i marknaden for utstyr til nye båtar og stabil høg etterspørsel i ettermarknaden (vedlikehald og reparasjonar). Oppdrag til nye båtar er aukande også i Volda, der selskapet også fortel om «spesielt god» aktivitet i ettermarknaden i fjor.

541 på lønningslista
Dei to selskapa er dei største produksjonsselskapa i Brunvoll-konsernet, og hadde tilsaman 541 tilsette i fjor.  391 arbeidde i Molde, 150 i Volda. Tilsaman 40 av dei tilsette var lærlingar.

Konsernet samla auka inntektene med 29 prosent i fjor, og 63 prosent sidan 2022, og ventar vidare vekst i 2025.

Rekordoverskot og rekordutbytte
I 2023 hadde Brunvollkonsernet eit resultat før skatt på 157 millionar kroner. Det tilsvarar eit resultat før skatt i høve til driftsinntektene på nær 11 prosent. Det var rekord, og i fjor vart det enda betre. Resultatet før skatt på 221 millioner kroner tilsvarar 11,9 prosent av driftsinntektene.

Konsernet er eigd av medlemar av Brunvoll-familien, fordelt på over 30 ulike aksjonærar, som etter 2024 deler på eit utbytte på 92 millionar kroner. Dei fleste aksjane er eigd gjennom eigne selskap.