Verdas største yacht blir enda større

Vard har signert ny kontrakt for levering Rev Ocean-skipet som Kjell Inge Røkke har bestilt. Det kjem fram av ei pressemelding frå selskapet fredag ettermiddag.

Ny leveringsdato for skipet er februar 2025. Det betyr at skipet vil vere klart for drift mot slutten av 2026, blir det opplyst i meldinga.

Skulle vore døypt i mai 2021
Skroget til det kombinerte yacht og forskingsskipet kom til Vard Brattvåg i 2019, og skulle etter opphavleg plan vore levert frå Vard i 2020.

På Haramskonferansen same år fortalde Nina Jensen i Rev Ocean til NETT NO at planen då var dåp i mai 2021 - og at absolutt siste frist for at skipet skulle vere klart, var september det året, då dei skulle delta på eit FN-arrangement i New York.

No ligg det an til at skipet kjem i drift meir enn fem år etter den opphavlege tidsplanen.

Blir verdas største yacht
Rev Ocean låg allereie an til å bli verdas største yacht med sine 183 meter.

Ifølgje den nye avtalen skal skipet byggjast om ved at det blir kutta i to – og truleg forlenga med 12 meter.

Ombygginga vil mellom anna føre til at hangaren på skipet blir større og får fleire vitskapsfunksjonar.

Kan bli sluttført ved Stavanger-verft
Vard skal sluttføre bygginga ved eit passande verft i Norge, blir det opplyst i meldinga.

Den endelege utrustinga skal skje ved eit passande verft, som vil bli avgjort seinare.

Ein rekke bedrifter på Nordvestlandet leverer utstyr til det som blir eit av verdas mest påkosta skip. Jensen har tidlegare uttalt at dei ønsker at skipet skal vere et utstillingsvindu for norske leverandører.