
Vil hente inntil fem millionar
Varda Care går til eigarane for å fylle på eigenkapitalen.
I løpet av juni reknar Varda Care med å ha henta mellom tre og fem millionar kroner i ny eigenkapital frå eksisterande eigarar. Det seier grunnleggar og medeigar Joakim Helland.
Ålesund-firmaet er spunne ut av velferdsteknologisatsinga til Helland Møbler-konsernet i Stordal, som også er største aksjonær i selskapet , med 43 prosent av aksjane.
Varda Care leverer sensorar som kan varsle om helsetilstanden til brukarane, og om brukarane treng hjelp frå pleiarar eller pårørande.
Å få gjennomslag i marknaden har imidlertid vist seg meir tidkrevande enn selskapet hadde sett for seg, og nyleg fekk aksjonærane vite at dei måtte gå inn mer meir pengar for å halde selskapet flytande.
Endra plan
Den opphavlege planen om å hente pengar frå nye investorar er utsett etter råd frå Norse Securities, som rådde selskapet til å be eksisterande eigarar skyte inn meir pengar og utvikle marknaden meir, før det ber nye investorar om pengar.
- Den ser det ut som vi skal kome godt i mål med, seier Joakim Helland.
Han seier Helland Møbler skal vere med på kapitalutvidinga, men kan ikkje tafeste kor stor andel møbelselskapet skal gå inn med.
Ny runde i haust
Ein ny emisjon retta mot nye investorar er målet å gjennomføre i løpet av tredje eller fjerde kvartal i år, ifølgje Helland.
Varda Care har henta inn kapital tidlegare, den eine gangen gjennom Folkeinvest den andre gjennom Dealflow. Både Dealflow og Folkeinvest er såkalla folkeinvest-selskap, som har spesialisert seg på å kople selskap med mindre investorar.
I 2022 henta Varda Care inn 8,6 millionar gjennom Folkeinvest. Der var minstemålet for kapitalutvidinga åtte millionar.
I 2020 henta selskapet 4,9 millionar kroner gjennom Dealflow. Det opphavlege målet var mellom åtte og ti millionar kroner.
Publisert: 29.05.2024 14:00
Sist oppdatert: 29.05.2024 23:34