- Vil setje arbeidet mange år attende

Uroa er stor hos dagleg leiar Ottar Håkonsholm ved Runde Miljøsenter etter framlegget til neste års statsbudsjett viser store kutt til senteret i Herøy.

Runde Miljøsenter har sidan 2015 fått tilskott over statsbudsjettet, og i 2022 var potten på 5,5 millionar.

Håpar på SV og opposisjonen
Potten er føreslått fjerna til neste år som eit ledd i regjeringa sitt arbeid med å redusere talet på tilskotsmottakarar.

Også ein pott på ein million kroner til Atlanterhavsparken i Ålesund er føreslått kutta i forslaget til budsjett.

No håpar Håkonsholm at SV og opposisjonen vil sørge for at kuttforslaget blir gjort om i det endelege budsjettet.

Senterleiaren på Runde seier det vil få svært negative følgjer for arbeidet ved senteret om dette blir vedteke.

– Statstilskotet utgjer ein vesentleg del av fundamentet for aktiviteten, og bortfall av dette vil setje arbeidet mange år attende, uttaler han i ei pressemelding.

Håkonsholm meiner at det er eit stort behov for forsking og formidling av kystøkologi, slik dei gjer, og viser til dramatisk nedgang i sjøfuglbestanden, og nedgang for kysttorsk og andre fiskebestandar langs kysten.