Årets unge bonde satsar vidare

I 2021 vart Sofie Høybakk på Vigra kåra til Årets unge bonde i Noreg og fekk ros frå dåverande landbruksminister Sandra Borch med på kjøpet.

I starten var Sofie Høybakk budd på ein tøff økonomi, men ikkje at det skulle vare ved - og bli enda tøffare.

Då Nett No møtte Høybakk i mars i år var det to alternativ ho hadde til vurdering, å legge ned drifta, eller å gå i samdrift med naboen. Om ho hadde lagt ned kunne Vigra ha hatt att berre ein bonde som dreiv mjølkeproduksjon.

Samdrift
No blir det samdrift med naboen.

Samtalane om ein avtale har gått eit års tid. Det er ikkje så rart når det er fem partar involvert, meiner Høybakk.

- Ting må modnast i sånne prosessar, seier ho.

Betre økonomi som student
– Eg tente meir pengar då eg var student og jobba ved sidan av. Det sa Høybakk om kva ho sat att med økonomisk av gardsdrifta til Nett No i mars i år.

Å gjere dei investeringane som må til for å innfri kravet om såkalla lausdriftfjøs, der kyrne hennar kan gå fritt omkring, vil koste rundt 12 millionar kroner. Det reknestykket går ikkje opp, men ved å gå i samdrift med naboen treng dei ikkje ta den investeringa.

Alt har blitt dyrare
Landbruksansvarleg Stig Tryggestad i Sparebanken Møre sa til Nett No i mars i pår at for bønder som nyleg har overteke gard og investert i løpet av dei fem siste åra, er det blitt tøft med rente og generell kostnadsauke på toppen.

– Det er mange som har slite dei to siste åra på grunn av kostnadsauken, sa han.

Trass i to gode landbruksoppgjer er det blitt tyngre, fordi kostnadane har auka enda meir. I tida før tilskotet frå landsbruksoppgjeret kjem i februar, er det mange som slit med likviditeten, ifølgje Tryggestad.