Ønskjer meir konkurranse i krillfisket

Denne veka sende Aker Qrill Company ut pressemelding om at selskapet har kjøpt skroget til det som skulle bli den nye krillrålaren til Stig Remøy-selskapet Rimfrost og medinvestorane hans. 

Fartøyet skal forlengast og fiske på den fjerde av krillkonsesjonane til Aker Qrill Company har for fiske etter den vesle krepsearten krill i Antarktis. Opphavleg skulle skroget utrustast for Rimfrost og fiske på Rimfrost sin krillkonsesjon.

Når styresmaktene skal vurdere dei naudsynte løyva som må til, meiner administerande direktør Audun Maråk at omsynet til målet om å ha fleire norske aktørar i dette fisket må telje med.

– Dersom der er andre interessentar som er interessert i å delta i fiskeriet, bør ein unngå ein yttelegare eigarkonsentrasjon med omsyn til dei norske fangsrettane i Antarktis, seier han.

Reagerte på Aker-sal
Fiskebåt er bransje- og arbeidsgivarorganisasjonen for eigarane av den havgåande fiskeflåten. 

Fiskebåt har engasjert seg i spørsmålet om eigarskap til krilltrålarar med norske konsesjonar i Antarktis, etter at selskapet Aker Biomarine i fjor skilde ut og selde ut ein stor del av verksemda til investorar i American Industrial Partners.

Fiskeridirektoratet godkjente transaksjonen, men Fiskebåt meinte Nærings- og Fiskeridepartementet burde vurdere om avgjerda var rett.

– Det som er viktig sett frå Fiskebåt si side er at Nærings- og fiskeridepartementet sikrar at fiskerirettane bli under norsk eigarskap og kontroll. Eg legg til grunn av Nærings- og fiskerdepartementet gjer dei naudsynte undersøkjingane, som avklarer den reelle situasjonen når det gjeld den reelle eigarskapen, seier Maråk.

Han er og oppteken av ringverknadane.

– Det må vere eit mål at krillråstoffet bidrar i norsk kostindustri og fôrindustri, og gir grunnlag for norsk innovasjon og norske arbeidsplassar.

Ikkje svart
Aker Qrill Company-sjef Webjørn Barstad sa tidlegare denne veka at eigarskapsmodellen til selskapet er velkjent, og fleire gangar godkjent av norske styresmakter.

Nærings- og Fiskeridepartementet har førebels ikkje svart på Fiskebåt sitt innspel.

«Departementet vil behandle henvendelsene fra Fiskebåt på vanlig måte. Dersom departementet finner grunnlag for å gå nærmere inn i saken, vil vi ta kontakt med partene i saken.», skreiv departementet i ein e-post til Sunnmørsposten i oktober 2024.