I 2001 var 54 prosent av alle som arbeidde i privat vareproduserande sektor - industrien og bygg og anlegg - medlemer i ei fagforeining. Organisasjonsgraden fall under 50 prosent for første gang i 2013 og i 2016 var organisasjonsgraden nede i 46 prosent.
Det viser den siste Fafo-rapporten om organisasjonsgraden i norsk arbeidsliv, som har oppdaterte tal til og med 2017/2016. Fafo er ei forskingstifting som mellom anna arbeider med arbeidslivsforsking. Rapporten er skriven av Kristine Nergaard.

Til saman har fagforeiningane greidd å oppretthalde ein stabil organisasjonsandel på rundt 50 prosent gjennom heile 2000-talet. Gjennom 90-talet fall organisasjonsgraden frå ein topp på rundt 55 prosent fram til rundt 2000. Deretter har fagforeiningane i stor grad klart å bremse fallet.

Store skilnadar

Men bak stabiliteten samla sett er det stor ulikskap mellom dei ulike hovudorganisasjonane, mellom offentleg og privat sektor og innad i privat sektor.
LO har tapt terreng sidan rundt 1975. Då var nesten tre av fire fagorganiserte med i ei fagforeining i LO. No har LO berre rett under halvparten av dei organiserte under sine venger, medan resten er spreidd på hovudorganisasjonane Akademikerne, Unio, Ys og andre mindre organisasjonar.

Tilbakegang for industri

Organisasjonsgraden i mange private tenesteytande bedrifter, som til dømes butikkar og restaurantar, har alltid vore lav.
Mellom 1995 og 2016 har organisasjonsgraden variert mellom 36 og 33 prosent, og var 35 prosent i 2016.
Det er fallet i andelen organiserte i privateigde vareproduserande bedrifter, som industribedrifter og bygge- og anleggsfirma, som er grunnen til at andelen fagorganiserte går ned i privat sektor. I tillegg er det blitt fleire arbeidstakarar i bransjar med færre organiserte.
I 1995 var 44 prosent av alle tilsette i privat sektor fagorganisert. I 2016 var andelen organiserte i private bedrifter samla sett nede i 38 prosent. Det er først og fremst i bygg- og anlegg det sviktar, ikkje i industrien. At den sysselsetttinga i bygg og anlegg går opp medan den går ned i industrien er også ugunstig for organisasjonsandelen.
"Organisasjonsgraden i bygg er klart lavere enn i industri, og bygg- og anlegg er en av bransjene med en klar nedgang i organisasjonsgrad over tid.", heiter det i Fafo-rapporten.

Godt grep om offentleg sektor

I offentleg sektor har fagforeiningane høg og stabil oppslutning.
78 prosent av dei tilsette i kommunane er fagorganisert, 83 prosent i statleg sektor.

Handel på botnen

Fafo har også rangert organisasjonsgraden for bransjar/verksemder meir detaljert.
Nederst, med 23 prosent organiserte, kjem varehandelen. På topp ligg tilsette i offentleg administrasjon, med 81 prosent. Bygg- og anlegg her ein organisasjonsandel på 37 prosent, industrien 57 prosent.