Aukande sjukefråvær på Vestlandet

(NPK-NTB): Sjukefråværet aukar på Vestlandet, viser tal frå Nav, som trur det har samanheng med den aukande arbeidsløysa.
– Vi trur at auken i sjukepengedagar heng saman med utvikling i arbeidsløysa. Ein indikasjon på dette er at auken er størst hos menn, og det er også blant menn at arbeidsløysa har auka mest, seier assisterande fylkesdirektør i Nav Rogaland, Anneline Christine Teigen, til Klassekampen.
I fjerde kvartal erstatta Nav 552.965 sjukepengedagar i Rogaland. Det er ein auke på 59.721 dagar og 12 prosent frå tilsvarande periode to år tidlegare.
Tala viser at auken i fylket var størst i fjerde kvartal 2015 med ein auke på 42.324 dagar og 8 prosent samanlikna med året før.
Også i Hordaland og Vest-Agder har det vore ein auke i talet på dagar Nav har utbetalt sjukepengar.
Det er no 12.101 heilt arbeidsledige i Rogaland, ein auke på 4.427 frå i fjor til i år, ifølge tal frå Nav.
Arbeidsmedisinar Ebba Wergeland åtvarar mot å tolke endringane i talet på sjukepengedagar utan å kjenne talet på sysselsette eller sjukemelde.
På grunn av endringar i rapporteringane frå arbeidsgjevarane har Nav førebels ikkje tal over sysselsette eller for sjukefråværsprosenten, som har vore brukt som standardmål tidlegare. (©NPK)