Auke i klippfiskeksporten

(NPK): Konvensjonell kvitfiskindustri har omsett større verdiar i klippfisk og saltfisk i årets augustmånad enn i fjor.

Noreg eksporterte 6 500 tonn klippfisk til ein verdi av 418 millionar kroner i august, skriv Kystogfjord.no.

Tala er ein reduksjon i volum på 6 prosent, men prisutviklinga gjer at den samla verdien auka med 58 millionar kroner, eller 16 prosent, samanlikna med august i fjor.

Portugal, Brasil og Den dominikanske republikken var dei største marknadene for norsk klippfisk i august. Eksportvolumet til den største klippfiskmarknaden vår Portugal fall 27 prosent, eller 500 tonn, til totalt 1 400 tonn i august.

Noreg eksporterte 957 tonn saltfisk til ein verdi av 56 millionar kroner i august.

Volumet auka med 8 prosent, medan verdien auka med 13 millionar kroner, eller 31 prosent, samanlikna med august i fjor. Portugal, Canada og Italia var dei største marknadene for norsk saltfisk i august.

(©NPK)