Eksfin opnar kontor i Bergen

(NPK): Eksportfinansiering Noreg (Eksfin) etablerer eit nytt regionkontor i Bergen. Kortare veg mellom kundane og Eksfin skal hjelpe vestlandsbedrifter med internasjonale ambisjonar.

– Etter vellykka erfaringar med regionkontora i Stavanger og Ålesund er utvidinga på Vestlandet ein naturleg del av satsinga til regjeringa på auka eksport. Kontoret vil gi Eksfin tettare samarbeid med lokale aktørar og næringslivet i Bergensregionen, seier næringsminister Cecilie Myrseth i ei pressemelding.

Det nye regionkontoret til Eksfin er meint å vere ein partnar for eksportbedrifter, i alt frå store grøne satsingar til små og mellomstore bedrifter med internasjonale ambisjonar.

Eksfins kontor blir samlokalisert med Innovasjon Noregs kontor i Bergen, i første omgang med éin medarbeidar. Det skal gjere det lettare for bedrifter i regionen å ta kontakt, møte begge verksemder eller bli vist vidare. Kontoret skal vere i drift innan første halvår 2026.

Eksportfinansiering Noreg (Eksfin) er ein etat under Nærings- og fiskeridepartementet.

(©NPK)