Equinor droppar elektrifisering av fleire felt

(NPK-NTB – Amalie Vadla): Equinor droppar å elektrifisera oljefelta på Haltenbanken og Tampen og grunngir det med høge kostnader.

– Kort sagt: Vi tilrår å stoppa elektrifiseringa av Haltenbanken og Tampen fordi tiltakskostnaden blir for høg, men å modna vidare Grane-Balder, seier Kjetil Hove, konserndirektør for Utforsking og produksjon i Noreg (EPN) i Equinor, til E24.

Dermed blir det truleg inga elektrifisering av felta Heidrun, Åsgard og Kristin på Haltenbanken utanfor Trøndelag og Snorre A og B i Nordsjøen.

I eit brev oljeselskapet har sendt til Energidepartementet, som E24 har sett, kjem Equinor med nye tilrådingar om prosjekta Haltenbanken, Tampen og Grane-Balder.

I brevet til regjeringa peikar Equinor på at tiltakskostnaden ikkje er akseptabel, og at det er stor uvisse om den politiske viljen til å gjennomføra tiltaka, ifølgje avisa.

Førre veke sa Sp at dei ville ta ein ny runde i Stortinget om elektrifisering av Haltenbanken, og fleire parti sa til NTB at dei stilte seg bak ein eventuell omkamp.

– Det er ei rett og viktig avgjerd av Equinor å skrinleggja elektrifiseringa av Haltenbanken. No må også Arbeidarpartiet i regjering følgja opp og leggja dette dødt éin gong for alle og ta med Grane-Balder og framtidige elektrifiseringsprosjekt, skriv Maren Grøthe, energipolitisk talsperson for Sp, i ein e-post til NTB.

Elektrifisering av sokkelen har vore eit stridstema i Stortinget, der fleire parti er sterkt imot – mellom anna fordi det kan føra til høge straumprisar, kostnadene er høge, det kan bety store naturinngrep, og somme stader kan det gå ut over andre næringar.

Miljøpolitisk talsperson for Raudt Sofie Marhaug meiner Equinor no må finna andre måtar å kutta utslepp på.

– Equinor og andre selskap kan ikkje ta for gitt at dei skal sleppa å kutta utslepp. Vi meiner at selskapa må kutta utslepp likevel gjennom å avvikla gamle, forureinande felt og gjennom bruk av karbonfangst og lagring, skriv ho i ein e-post til NTB.