Fagforbundet krev nasjonal produksjon

NPK-NTB: Fagforbundet meiner Noreg både må produsere sjølv og ha beredskapsslager av smittevernutstyr etter tilfelle i helsevesenet der tilsette har stått utan utstyr.
Fagforbundet er Noregs største fagforbund og har med sine 395.000 medlemmer organiserte både i kommunale omsorgstenester og helsevesenet, skriv Klassekampen.
Etter erfaringane frå koronautbrotet, der mange helsearbeidarar har opplevd å måtte jobbe utan grunnleggjande smittevernutstyr, meiner leiar Mette Nord at det trengst ei ny nasjonal ordning der kritisk utstyr og medisinar må produserast og lagrast.
– Det er ikkje akseptabelt at folk må jobbe med livet som innsats. Sjølv om det ikkje bedriftsøkonomisk sett er lønnsamt å ha ting på lager, kan vi ikkje tenkje slik når det gjeld samfunnet, seier ho til avisa.
Nord gir ikkje uttrykt støtte til Raudt-leiar Bjørnar Moxnes som førre veke tok til orde for at staten skulle ta tilbake Norsk Medisinaldepot, som vart privatisert i 2001, men seier det høyrest fornuftig ut.
– Det vi har sagt er at vi må ha nasjonal kontroll. Det er staten som har dei nødvendige verktøya for å kunne produsere og sikre at vi har det vi treng, seier Nord.