Fleire overnatta på campingplassar i mai

(NPK-NTB): Talet på overnattingar på campingplassar auka med 11 prosent frå mai i fjor til same månad i år, men hotella slit framleis veldig.
Utbrotet av koronaviruset og dei følgjande nasjonale og internasjonale tiltaka for å stanse spreiinga fekk store konsekvensar for dei kommersielle overnattingsstadene, særleg for hotell og hyttegrender.
For hotella var det ein reduksjon i talet på overnattingar i mai med 78 prosent frå same månad i fjor, viser ferske tal frå .
Samanlikna med april er likevel talet på overnattingar på hotell meir enn dobla, men framleis svært lågt. Det var 1,6 millionar færre hotellovernattingar i mai i år enn same månad i fjor.
Til saman var det om lag ein million overnattingar i mai ved kommersielle overnattingsstader i mai, ein nedgang på heile 62 prosent frå same månad i 2019. For hytter og vandrarheimar fall talet på overnattingar med 64 prosent.
– Etter to svært krevjande månader der overnattingane fall med 55 prosent i mars og 84 prosent i april frå tilsvarande månader i 2019, kan vi no sjå at overnattingsgjestene er på veg tilbake, seier rådgivar Jarle Kvile i SSB.
(©NPK)