Flyteknikarar varslar sympatistreik

(NPK-NTB-Amalie Vadla): SAS-streiken kan ramme endå fleire dersom andre flyplasspersonell går ut i sympatistreik, åtvarar leiaren for SAS-flygarane i Noreg, Roger Klokset.

Flyteknikarar i Danmark har varsla sympatistreik frå onsdag 6. juli, og då blir også ramma underselskapet SAS Connect, opplyser Klokset.

Han kjenner ikkje til at fleire har varsla sympatistreik.

– Perspektivet vårt er at denne streiken må vare så lenge som nødvendig. Vi har ikkje råd til å tape denne kampen, som vi meiner er at angrep på den skandinaviske flyselskapsmodellen, seier han til NTB.

Måndag vart det brot i meklinga mellom SAS-leiinga og pilotane. Dermed går 900 av flygarane til selskapet i Noreg, Sverige og Danmark ut i streik. Dei flygingane som blir gjennomførte av SAS Link, SAS Connect og SAS' eksterne partnarar blir ikkje ramma av streiken – enno.

– Pressar oss i eit hjørne
Kjernen i konflikten er skipinga av to bemanningsselskap. Då pandemien ramma, mista rundt 560 pilotar jobben. Samtidig vart dotterselskapa SAS Link og SAS Connect oppretta. Desse skal overta fly og fyllast med nye pilotar.

Pilotforeininga ønskjer ei forsikring om at medlemmene deira får dei nye arbeidsplassane.

– SAS-leiinga har pressa oss inn i eit hjørne, og eg legg ansvaret for denne streiken på dei. Dei vil omgå tariffavtalen på ein ulovleg måte. Og dei tek andre pilotar inn i bemanningsbyråa, samtidig som det framleis er 450 flygarar som framleis står ute i kulda og utan jobb, seier Klokset.

Han seier at dersom han og kollegaene skal setje seg ned ved forhandlingsbordet, må SAS leiinga leggje fram gode poeng.

– Det er neste steig, men det er ingen planar om det førebels, seier han.

Sendar kritikk i retur
Klokset meiner at SAS-flygarane har strekt seg langt for å komme leiingas i møte krav.

SAS-leiinga på si side meiner at pilotane viser «sjokkerande liten forståing» for situasjonen for selskapet.

– Vi har nettopp vore gjennom ein forferdeleg pandemi, vi har fått mange pengar frå skattebetalarane, og det er derfor skammeleg at dette er måten pilotane betaler tilbake sjenerøsiteten og tolmodet som alle landa har hatt med selskapet, sa SAS-sjef Anko Van der Werff til pressa då det vart klart at meklinga ikkje hadde ført fram måndag ettermiddag.

– Den kritikken sender eg rett i retur, kontrar Klokset.

– Vi har strekt oss langt, men vi står i ei krise og ein i kamp for framtida vår. Det dei ber om vidare, kan vi ikkje godta. Smertepunktet vårt er nådd, seier han vidare.

Optimistisk
Måndag er totalt 78 SAS-flygingar frå Noreg innstilt på grunn av streiken. Streiken vil ramme rundt 250 avgangar og 45.000 reisande dagleg, ifølgje nyheitsbyrået TT.

– Eg er smerteleg klar over og lei meg for korleis dette påverkar passasjerane våre. Det er dessverre slik at ein arbeidskonflikt i bransjen vår kan ramme ein tredjepart, seier Klokset.

– Vi har alle eit ansvar for å finne fram til ei løysing, men eg gjentek at denne kampen er viktig for arbeidslivet til skandinaviske flygarar i tida framover.

Han understrekar at det er viktig flygarane står på sitt i denne konflikten, men er optimistisk til at det kan komme ei løysing snart, gitt at leiinga «tar ein rekke grep».

(©NPK)