Forlengar dagpengeordning

NPK-NTB: Regjeringa utvidar dagpengeordninga for langtidspermitterte i fiskeindustrien frå 26 til 52 veker. Den nye ordninga trer i kraft frå 1. desember i år.

Løysinga skal bøte på utfordringane som har ramma næringa etter kutt i fiskekvotane i år.

Fiskeriminister Marianne Sivertsen Næss (Ap) ønskjer å ha betre inntektssikring for dei permitterte i fiskeindustrien, ifølgje NRK.

– Dette er ei mellombels løysing inntil vi får på plass ei permanent ordning, seier Sivertsen Næss.

Langtidsplanen er å få på plass ei permanent ordning for lønnsplikt etter 26 veker for bedrifter i fiskeindustrien. Målet er å få på plass denne ordninga frå 2026.

– Det er positivt at regjeringa no gjeninnfører ordninga, seier Kyrre Dale, direktør for industri i Sjømat Norge.

Han legg til at den norske fiskeindustrien i mange år har hatt særreglar for bruk av permitteringar.

– Varierande kvotenivå, tilgjengelegheit og vêrforhold skaper utfordringar for fiskeindustrien. Derfor er det viktig å ha treffsikre ordningar, seier Dale.

Ifølgje Dale er det urovekkjande at regjeringa samtidig varslar at dei på sikt planlegg å innføre lønnsplikt etter veke 26.

– I ei tid med stor kvotenedgang og stort press på fiskeindustrien er det ikkje tidspunktet for å skyve auka kostnader over på fiskeindustrien, seier Dale.