Hamnene framleis opne for russarar

Utanriksminister Anniken Huitfeldt (Ap) ser ikkje bort frå at norske hamner kan bli stengde for russiske skip, men inntil vidare blir dei framleis sleppe til.

– Eg har ikkje sagt at vi heilt ser bort frå å stengje desse hamnene. Men det er av omsyn til felles fiskeriforvaltning at vi må ta vare på den torskestammen som vi har. Men vi må også føre auka kontroll, seier utanriksminister Anniken Huitfeldt (Ap).

Onsdag vart ho pressa i Stortinget av både Høgre og Venstre på om det framleis er trygt å sleppe russiske skip til i norske hamner.

I motsetning til EU, har Noreg eit unntak frå sanksjonsregelverket, og slepper til russiske fiskefartøy i tre hamnar: Tromsø, Kirkenes og Båtsfjord.
På spørsmål frå Høgres Ine Eriksen Søreide om kva risikovurderingar regjeringa gjer, sa Huitfeldt at det kan bli aktuelt å stramme inn på dagens regelverk.

– Ein type innstramming kan vere talet på liggjedøgn som eit skip har ved kvar enkelt hamn, sa Huitfeldt.

Venstres Guri Melby viste til ein dokumentarserie på NRK som har peika på fiskebåtar og andre fartøy frå Russland kan drive etterretning i Noreg.

– Russiske trålarar dukkar opp ved viktige olje- og gassfelt, ved militære øvingsområde og ved viktige knutepunkt som det norske forsvaret treng for å flytte styrkane sine, påpeika Melby.

Huitfeldt sådde ein viss tvil rundt det som har komme fram i dokumentarserien.

– Vi gjennomfører tiltak i norsk politikk basert på den informasjonen som vi har, og alle moglege påstandar som blir framstilte i media må jo nødvendigvis kvalitetssikrast. Det er ikkje alltid at vi har den same opplevinga av situasjonen som kanskje ulike journalistar har, sa Huitfeldt.

Ho viste til at det er omfattande kontroll i desse områda, og at skipa må lande fisk for å kunne gå innom dei tre hamnene som framleis er opne.