Høgre vil ha 20 gonger meir havvind

(NPK-NTB): Noreg bør lyse ut 3 gigawatt (GW) havvind kvart år frå 2025, meiner Høgre i energiplanen sin. Det svarer til straum til over 900.000 hushald.

– Med Høgres nye planar vil Noreg ha utlyst 30 GW innan 2035. Det er omtrent på linje med all norsk vasskraftproduksjon, seier Høgres Nikolai Astrup til E24.

Høgre legg torsdag fram energiplanen sin. Astrup fryktar at Senterpartiet hindrar framdrifta i havvindsatsinga.

– Bekymringa vår er at intern usemje mellom regjeringspartia gjer at satsinga blir skalert ned. Det har vi allereie sett på Sørlige Nordsjø II, der satsinga vart redusert frå 3 GW til 1,5 GW, seier han.

Havvind-satsinga til Støre-regjeringa legg opp til at Noreg skal produsere 1,5 GW straum frå havvind i 2030. Dette er klart mindre enn ønsket til Solberg-regjeringa om 4,5.

Astrup etterlyser fortgang i konsesjonsprosessane.

– Vi meiner til dømes at konsesjonsplanar og detaljerte planar skal kunne leverast samtidig. Vi meiner dette kan halvere behandlingstida i prosessane. Vi har ikkje tid til at ting skal ta så lang tid som det gjer i dag.

I den nye energiplanen sin meiner Høgre at Noreg mellom anna må:

• Kunngjere 3 GW havvindareal kvart år frå 2025.
• Gi konsesjonar for Utsira Nord og Sørlige Nordsjø II i år.
• Utvide Sørlige Nordsjø II.
• Effektivisere konsesjonsprosessen.
• Kople havvindsatsinga til utlandet.
• Delelektrifisere sokkelen med havvind fortare.

(©NPK)